გირჩის ერთ-ერთი ლიდერი, იაგო ხვიჩია, ოპოზიციურ პარტიებს შორის მიმდინარე დისკუსიაზე საუბრისას ამბობს, რომ როგორც კი მოლაპარაკებების ცენტრალური ხაზისგან განსხვავებულ აზრს დააფიქსირებ, იწყება თავდასხმა და ლანძღვა. TV პირველთან საუბარში, ხვიჩიამ აღნიშნა, რომ ასეთი დამოკიდებულების გამო, ოპოზიციაში, ფაქტობრივად აკრძალულია მსჯელობა ძალიან მნიშვნელოვან საკითხებზე.

" ... ფაქტობრივად, როგორც კი რამე განსხვავებულს იტყვი ცენტრალური ხაზისგან, რომელიც შეიძლება წინასწარ შეთანხმებულია, არის უაზრო თავდასხმა, ლაპარაკის გარეშე, უბრალოდ ლანძღვა. როგორც მედიის, ისე ოპოზიციური პარტიების მხრიდან [...] ფაქტობრივად, ასეთი დამოკიდებულებით, ავკრძალეთ მსჯელობა ძალიან მნიშვნელოვან რამეზე. გესმით? ავკრძალეთ, მათ შორის, მაგიდაზე რა დოკუმენტიც დევს იმაზე. აჩემებული აქვს ყველას — მარტო საარჩევო რეფორმაზე შედიხართ?! მაგ მაგიდაზე დევს პროპორციული არჩევნების კონტურებიც, რომელზეც ბოლო ორი წელია ვიბრძოდით. ჩემთვის რაც იყო ინტერესის საგანი. ეს იმას კი არ ნიშნავს რომ სადმე შევრბივართ, უბრალოდ, ლაპარაკი დავიწყოთ. ლაპარაკი მომავალზე და იმაზე, რა დევს მოლაპარაკების მაგიდაზე", — განაცხადა იაგო ხვიჩიამ.

11 დეკემბერს, მე-10 მოწვევის პარლამენტის პირველი სხდომა გაიმართა, რომელსაც მხოლოდ ქართული ოცნება დაესწრო. პარალელურად ბარიერგადალახული ოპოზიციური პარტიები მოსწავლე ახალგაზრდობის სასახლის ბაღში შეიკრიბნენ და საპარალამენტო მანდატებზე უარს თქმის შესახებ განცხადებას ხელს საჯაროდ მოაწერეს.

ადგილზე არ გამოჩენილან გირჩისა და მოქალაქეების ლიდერები. სხვა ოპოზიციური პარტიებისგან განსხვავებით, ისინი ჯერჯერობით ოფიციალურად უარს არ ამბობენ საპარლამენტო მანდატებზე და ამბობენ, რომ ფასილიტატორი ელჩების შუამავლობით მოლაპარაკებები მმართველ პარტიასა და ოპოზიციას შორის ჯერ კიდევ მიმდინარეობს და გადაწყვეტილებას პარლამენტში შესვლა/არშესვლის შესახებ შეთანხმების შესაბამისად მიიღებენ.

გარდა ამისა, გირჩი და მოქალაქეები არის ის ოპოზიციური პარტიები, რომლებმაც შესაბამისი ბარიერის გადალახვის მიუხედავად, სახელმწიფოსგან პარტიულ დაფინანსებაზე უარი თქვეს.

გაიგეთ მეტი: