მოქალაქეების ლიდერის, ალეკოს ელისაშვილის თქმით, ISFED-ის ახალი დასკვნა, რომლის მიხედვითაც ხმების დათვლის ფორმულაში მათ ხარვეზები გამოუვლინდათ, ძალიან ასუსტებს ოპოზიციას. ამის შესახებ მან რუსთავი 2-ის ეთერში ისაუბრა.

"სიმართლე გითხრათ, ერთი სამჯერ გადავიკითხე ეს დასკვნა და თავიდან არ ვუჯერებდი, მეგონა, რომ ფეიკი იყო. ISFED არის ყველაზე სანდო, ისტორიულად, რაც ჩვენთან არჩევნები ტარდება, ყველაზე სანდო. როცა ISFED ამბობს, რომ ჰქონდა ხარვეზი და არასწორად დაითვალა, ეს ძალიან ასუსტებს ოპოზიციის პოზიციას. პირდაპირ ვიტყვი, ეს არის დარტყმა ოპოზიციაზე", — თქვა ელისაშვილმა.

ISFED-ის ცნობით, ხმების პარალელური დათვლის პირველადი შიდა აუდიტის შედეგებმა PVT მეთოდოლოგიის სიზუსტე და დამკვირვებლების მიერ მოწოდებული ინფორმაციის სანდოობა დაადასტურა. თუმცა გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში.

მანამდე ცნობილი გახდა, რომ მმართველი პარტიის წარმომადგენლები ISFED-ს შეხვდნენ. ქართულ ოცნებაში აცხადებდნენ, რომ შეხვედრა ISFED-ის მიერ ჩატარებული პარალელური ხმის დათვლის შედეგებს ეხებოდა და მათ ორგანიზაციას მეთოდოლოგიის შესახებ მონაცემების წარმოდგენა მოსთხოვეს.