პრემიერმინისტრმა გიორგი კვირიკაშვილმა ჯარისკაც გია ცერცვაძის საქმეზე პირველი კომენტარი გააკეთა. მისი თქმით, დიდი იმედი აქვს, რომ საქმე ისე გადაწყდება, რომ ცერცვაძეს რუსეთს არ გადასცემენ:

"საქართველო არ გადასცემს საკუთარ მოქალაქეებს სხვა ქვეყანას, მითუმეტეს იმ ქვეყანას, რომელსაც სამხედრო ბაზები ჰყავს განთავსებული ჩვენს ტერიტორიაზე. აქ კითხვის ნიშნები საერთოდ არ უნდა იყოს, 2 დღეა ჩვენი მთავარი პროკურორი ირაკლი შოთაძე ყოველწუთიერ კონტაქტზეა უკრაინის გენ. პროკურორთან და ძალიან დიდი იმედი გვაქვს, რომ ეს საქმე გადაწყდება ისე, რომ ბატონი ცერცვაძეს რუსეთს არ გადასცემენ".

ამის შემდეგ, კვირიკაშვილმა ვრცელი კომენტარი გააკეთა იმაზე, რომ აღნიშნული საკითხი ნაციონალური მოძრაობის, არასამთავრობოების ნაწილისა და მედიის მხრიდან სპეციალურადაა დღის წესრიგში, რომ ქართულ ოცნებას თავის მართლება მოუწიოს:

"მაგრამ, მთავარი სულ სხვა რამეა, ჩვენს ოპონენტებს აქვთ სურვილი, რომ ჩვენ მუდმივად ვიმყოფებოდეთ თავის მართლების რეჟიმში, მათ რა თქმა უნდა აიყოლიეს საკუთარი ტელევიზია, მათი პარტნიორი ტელევიზიები, არასამთავრობო სექტორის ნაწილი და უნდათ, რომ ჩვენ ამოგვაგდონ მთავარი დღის წესრიგიდან და ვიმყოფებოდეთ თავის მართლებაში, რომ ჩვენ არ ვართ ქვეყნის დამაქცევარნი".

პრემიერმინისტრმა ნაციონალური მოძრაობა ხელისუფლებაში ყოფნის დროს ჯარისკაცების ამოხოცვასა და საქართველოს უსაფრთხოების "ათწლეულობით დაზიანებაში" დაადანაშაულა:

"ეს ხდება იმ პოლიტიკური ძალის მხრიდან, რომელსაც ძალიან დიდი წვლილი მიუძღვის ჩვენი ქვეყნის უსაფრთხოების ათწლეულობით ესე ვთქვათ პერიოდის განმავლობაში დაზიანებაზე, რომელმაც ჩვენი ქვეყანა წამოაგო უმძიმეს პროვოკაციას რუსეთის იმპერიალისტურ ზრახვების განხორციელებას მწვანე შუქი აუნთო და უფრო მეტიც, ისინი გვდებენ ჩვენ ბრალს სამხედროების უპატივცემულობაში, როდესაც 2008 წლის კონფლიქტის მონაწილე თითქმის ნახევარი ჯარი ციხეში ამოალპეს, ჩახოცეს ციხეში უფრო მეტიც, რომლებმაც გვამებიც კი არ გამოასვენეს კონფლიქტის ზონიდან, რომლებმაც უმძიმესი პროვოკაცია მოაწყვეს კოდორის ხეობაში და იქ მყოფი გმირი ადამიანები ჩახოცეს, და რომლებმაც, კრიალაშვილი, რომელიც უკვე გვამი იყო, სკამზე მიაბეს და მერე კიდე დახვრიტეს. ეს ადამიანები დღეს ჩვენ გვდებენ ბრალს სამხედროების უპატივცემულობაში".

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში, ინტერპოლის მოთხოვნით დააპატიმრეს.

ოპოზიციური პარტიების და სამოქალაქო სექტორის ნაწილი ითხოვს, რომ ის რუსეთის ფედერაციას არ გადაეცეს.