საქართველოს ყოფილი პრეზიდენტის, მიხეილ სააკაშვილის თქმით, ვინც დღეს პარლამენტში არშესვლასა და მანდატების გაუქმებას ხელი მოაწერა, უარი თქვა, არა მხოლოდ "ცივ ამინდში თბილ შენობაში კომფორტულ სავარძლებზე" ასევე ყოველთვიურ ხელფასზე — ქართული ოცნების ლიდერის, ბიძინა ივანიშვილის "შემოთავაზებულ ორ მილიონზე თითო ადამიანზე".

"თქვა უარი იმის გამო, რომ გრძნობს პასუხისმგებლობას ქართველი ხალხის წინაშე — ეს არის ნამდვილი სამოქალაქო გმირობა. ამიტომ ჩემგან, როგორც საქართველოს ერთ-ერთი შვილისგან დიდი მადლობა თითოეულ თქვენგანს. შეიძლება ადრე ბევრ თქვენგანს არ ვეთანხმებოდი, ვაკრიტიკებდი, მაგრამ დღეს მართლა ქედს ვიხრი თქვენი სამოქალაქო გმირობის და გამბედაობის წინაშე! ეს არის ჩვენი საერთო გამარჯვების საწინდარი რაც დღეს მოხდა", — დაწერა საკუთარ ფეისბუქ გვერდზე მან.

დღეს, 11 დეკემბერს პარლამენტში მე-10 მოწვევის სხდომა მიმდინარეობს, რომელშიც მხოლოდ ქართული ოცნება იღებს მონაწილეობას. სხდომაზე ასევე არიან მიწვეული პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრება.

სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ.