პარტია სამართლიანობის ლიდერი, ეკა ბესელია ოპოზიციურ პარტიებს ურჩევს, რომ შემდეგ მოლაპარაკებებზე მმართველი პარტიის აღმასრულებელი მდივანი, ირაკლი კობახიძე, როგორც მომლაპარაკებელი არ მიიღონ, რადგან "კობახიძეს არ უნდა ელაპარაკო". ამის შესახებ მან მთავარი არხის ეთერში ისაუბრა.

"განსაკუთრებით, მისი ბოლო პროვოკაციული ბრიფინგის შემდეგ. ეს არის ჩემი პოზიცია, რომელსაც შევთავაზებდი კოლეგებს. შეილება, ნორმალური არავინ არ იყოს და ვარსკვლავებს არავინ არ წყვეტს, მაგრამ კობახიძეს არ უნდა ელაპარაკო, მე მგონი. უნდა იყოს ვინმე სხვა, რადგან, როგორც კი ის გამოჩნდა, სრული დესტრუქცია დაიწყო", — განაცხადა ბესელიამ.

დღეს, 11 დეკემბერს პარლამენტში მე-10 მოწვევის სხდომა მიმდინარეობდა, რომელშიც მხოლოდ ქართული ოცნება მონაწილეობდა. სხდომაზე ასევე მიწვეულები იყვნენ პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრება.

სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ. ამასთან, ოპოზიციამ ხელმოწერილი განცხადებები, სიის განულების მოთზხოვნით, ცესკო-ში უკვე ჩააბარა.