ქართულ ოცნებაში აპირებენ, წარადგინონ კანონპროექტი, რომელიც საარჩევნო რეგისტრაციას გაუუქმებს პარტიას, რომლის ლიდერიც საკონსტიტუციო ცენზს ვერ დააკმაყოფილებს. იმედის ეთერში პარტიის აღმასრულებელმა მდივანმა, ირაკლი კობახიძემ ნაციონალურ მოძრაობასა და ექს-პრეზიდენტ მიხეილ სააკაშვილზე ისაუბრა.

კობახიძის თქმით, მიხეილ სააკაშვილია, რომელიც არ აკმაყოფილებს ორ კონსტიტუციურ ცენზს — არ არის საქართველოს მოქალაქე და შეფარდებული აქვს თავისუფლების აღკვეთა, რაც აღსრულებას ექვემდებარება. როგორც იგი განმარტავს, ეს კანონპროექტი არის კონსტიტუციური მოთხოვნის აღსრულების გარანტირებული მექანიზმი.

მიხეილ სააკაშვილი ამჟამად უკრაინის მოქალაქეა და კონსტიტუციის თანახმად, ის პარტიის ლიდერი ოფიციალურად ვერ იქნება და არც არის. კობახიძის თქმით, უამრავი შემთხვევაა, როცა კონკრეტული ორგანოები საკუთარი განსჯისა და მსჯელობის საფუძველზე იღებენ გადაწყვეტილებას:

"რომ ავიღოთ ეს არჩევნები, ნებისმიერი ობიექტური დამკვირვებლისთვისა და შემფასებლისთვის ცხადია, რომ მიუხედავად ფორმალური სტატუსის არქონისა მიხეილ სააკაშვილი მონაწილეობდა ამ არჩევნებში ღიად, როგორც პარტიის ლიდერი. ნებისმიერი ობიექტური დამკვირვებელი და შესაბამისი ორგანო დაადგენდა, რომ ამ შემთხვევაში ირღვეოდა კონსტიტუციის მოთხოვნა და რომ ყოფილი კანონის ასეთი ჩანაწერი, ეს გახდებოდა პარტიის საარჩევნო რეგისტრაციიდან მოხსნის საფუძველი".

კობახიძისვე განმარტებით, საუბარია მხოლოდ საარჩევნო რეგისტრაციის გაუქმებაზე და ეს ვერც ერთ შემდეგ არჩევნებზე ვერ იმოქმედებს. გარდა ამისა, იგი ამბობს, რომ ეს კანონპროექტი მნიშვნელოვანია, რათა ქვეყანაში პოლარიზაციის ხარისხი შემცირდეს.