ქართული ოცნების ერთ-ერთი ლიდერის, ირაკლი კობახიძის თქმით, "ამბოხის სცენარში" მონაწილე პარტიებს, რომლებიც უარს იტყვიან მანდატებზე, დაუკმაყოფილდებათ ეს მოთხოვნა. ამის შესახებ მან პარტიაში გამართულ ბრიფინგზე ისაუბრა.

"ის პარტიები, რომლებიც არიან ამბოხის სცენარის მონაწილეები და ამბობენ უარს მანდატებზე, ძალიანაც კარგი. ბუნებრივია ეს მოთხოვნა მათ დაუკმაყოფილდებათ პარლამენტის გადაწყვეტილების საფუძველზე. რაც შეეხება იმ პარტიებს, რომლებიც არ არიან ამ სცენარის მონაწილეები და არ იქნებიან მონაწილეები, ისინი ბუნებრივია არც წარმოადგენენ ასეთ განცხადებას. იმ პარტიების ადგილი, რომლებიც უპირისპირდებიან დასავლურ და ქართულ ინსტიტუტებს, საქართველოს პარლამენტში, ბუნებრივია, არ არის. ზუსტად ამან განაპირობა ჩვენი გადაწყვეტილების ცვლილება", — განაცხადა მან.

ირაკლი კობახიძემ, ასევე, განმარტა, მანამდე საუბარი იყო, რომ საპარლამენტო უფლებამოსილება არ შეუწყდებოდა არავის, ახლა კი მათ ოპოზიციური პარტიების მოთხოვნა დააკმაყოფილეს და შეუწყვიტეს. ამის მიზეზი კი იყო ამბოხის ინტერესია, რომელიც, მისი თქმით, ზოგიერთ ოპოზიციურ პარტიას აქვს.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და არჩევნების მეორე ტურსაც ბოიკოტი გამოუცხადეს, რომელიც 21 ნოემბერს ჩატარდა. მეორე ტურში არცერთი ოპოზიციური პარტია არ მონაწილეობდა. 17 მაჟორიტარულ ოლქის გარდა მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

მეოთხე რაუნდი 8 დეკემბერს შედგა. ოპოზიციისა და მმართველი პარტიის წინადადებები მხარეებმა პუნქტებად განიხილეს. როგორც შეხვედრის დასრულების შემდეგ განაცხადეს, იყო პუნქტები, რომლებზეც თანხვედრა მოხდა, თუმცა, დარჩა რამდენიმე პრინციპული პუნქტი, რაზეც ჯერ ვერ შეთანხმდნენ. ამის ფონზე, ქართული ოცნების ლიდერები აცხადებენ, რომ მათი განწყობა პოზიტიურია და სჯერათ — მომავალ წელს პარლამენტში ყველა დეპუტატი იქნება. ამ ეტაპზე მოლაპარაკებების მეხუთე რაუნდის მოლოდინია.