სტრატეგია აღმაშენებლის ლიდერის, გიორგი ვაშაძის განცხადებით, ელჩების მონაწილეობით ხელისუფლებასა და ოპოზიციას შორის მოლაპარაკებებში რიგგარეშე არჩევნებთან დაკავშირებით პროგრესი არ არის. ამის შესახებ მან ამერიკის ელჩის რეზიდენციაში გამართული შეხვედრის შემდეგ განაცხადა. ვაშაძის ინფორმაციით, ქართული ოცნების წინადადებები საარჩევნო რეფორმას უკავშირდებოდა.

"იმედი მაქვს, რომ იქნება შეთანხმება. თუ არ იქნება, არ იქნება, რა ვუყოთ. ერთი რამ შემიძლია საჯაროდ ვთქვა გარკვეული საკითხები, რაც აინტერესებდა ამომრჩეველს, რაზე არის საუბარი — არის საუბარი როგორც საპარლამენტო საარჩევნო სისტემაზე, ასევე, თვითმმართველობის საარჩევნო სისტემაზე, ასევე, საარჩევნო რეფორმებზე. დღეს პირდაპირ გეუბნებით, რა საკითხებზე ვსაუბრობთ. რიგგარეშე არჩევნებთან დაკავშირებით პროგრესი არ არის", — განაცხადა მან.

ვაშაძის თქმით, მოლაპარაკებები კვლავ გაგრძელდება. მან ასევე აღნიშნა, რომ სანამ კონკრეტული პოზიციები არ ჩამოყალიბდება საერთო ოპოზიციურ ფორმატში, პარლამენტში არავინ შევა. ვაშაძემ წუხილი გამოთქვა მის პარლამენტში შესვლასთან დაკავშირებით გავრცელებულ ინფორმაციაზე და ამას "ბინძური კამპანია" უწოდა.