გირჩის ლიდერი, ზურაბ ჯაფარიძე ამბობს, რომ ქართულ ოცნებასთან ზოგიერთ პრინციპულ საკითხზე თანხვედრა არის. როგორც მან განმარტა, ეს საკითხები ეხება საარჩევნო ადმინისტრაციის ცვლილებასა და საარჩევნო პროცედურებს. ამის შესახებ მან აშშ-ს ელჩის რეზიდენციის დატოვების შემდეგ განაცხადა.

რაც შეეხება დღევანდელ შეხვედრას, ჯაფარიძის თქმით, მათ პუნქტობრივად მმართველი პარტიისა და ოპოზიციის მიერ შეჯერებული პოზიციები განიხილეს. მისივე თქმით, შეხვედრაზე მოლაპარაკებების გასაჯაროებაზეც იმსჯელეს.

"მომლაპარაკებლების პოზიცია იყო, რომ თუ ყველაფერი გასაჯაროვდება, ამან შეიძლება დააზიანოს მოლაპარაკების პროცესი", — აღნიშნა ჯაფარიძემ.

ელჩების შუამავლობით ოპოზიციასა და ქართულ ოცნებას შორის მოლაპარაკებები გრძელდება. ორივე მხარე აცხადებს, რომ ჯერ შეთანხმება მიღწეული არაა, თუმცა პოზიციები უფრო დაუახლოვდა ერთმანეთს.

ოპოზიცია საკანონმდებლო ორგანოში შესვლას კვლავ არ აპირებს, მმართველ პარტიაში კი იმედი აქვთ, რომ მეათე მოწვევის პარლამენტი ერთპარტიული არ იქნება.

ახლადარჩეული პარლამენტის პირველი სხდომა 11 დეკემბერს გაიმართება. მხარეები ამბობენ, რომ შეხვედრები კიდევ გაიმართება, თუმცა ზუსტი თარიღი ისევ უცნობია.

ამავე თემაზე: