ჯანდაცვის სამინისტროს ინფორმაციით, საყოველთაო ჯანდაცვის პროგრამის ფარგლებში, უწყება უფლებამოსილია სასამართლოს დასრულებამდე სადავო თანხები კლინიკებს შემდეგი თვეების ანაზღაურებიდან დაუქვითოს.

აღნიშნული გადაწყვეტილება მთავრობის დღევანდელ სხდომაზე მიიღეს.

ჯანდაცვის სამინისტრო აცხადებს, რომ კანონით მინიჭებული ვალდებულებების ფარგლებში განახორციელებს საბიუჯეტო ხარჯების მიზნობრიობის და ეფექტიანობის კონტროლს.

"მონიტორინგის შედეგად გამოვლინდა შემთხვევები, როდესაც რიგი კლინიკები საყოველთაო ჯანდაცვის პროგრამის ფარგლებში დაუსაბუთებლად ითხოვენ თანხას. შემთხვევათა აბსოლუტურ უმრავლესობაში სადაო თანხა სამედიცინო დაწესებულებების მხრიდან საჩივრდება სასამართლოში, თუმცა ასეთი დავები ხშირ შემთხვევაში წელიწადზე მეტ ხანს გრძელდება. შესაბამისად ვერ ხდება თანხის ბიუჯეტში დროული მიმოქცევა. რაც სერიოზული პრობლემა იყო ერთი მხრივ, ბიუჯეტის პარამეტრების ადეკვატური შესრულებისთვის, ხოლო მეორე მხრივ, კლინიკებთან ადეკვატური საქმიანი ურთიერთობების დასამყარებლად" - აცხადებენ სამინისტროში.

ამ დროისთვის, სასამართლო დავა ჯანდაცვის სამინისტროს 21-ზე მეტ კლინიკასთან 100-ზე მეტ შემთხვევაზე აქვს. უწყების ცნობით, საუბარია ჯამში 8 მილიონ ლარზე.

იმ შემთხვევაში თუ სასამართლო კლინიკის სასარგებლოდ მიიღებს გადაწყვეტილებას, აღნიშნული თანხა დაწესებულებას უკან დაუბრუნდება.

ჯანდაცვის სამინისტროს ინფორმაციით, ადმინისტრირების ახალი წესი გათვლილია იმაზეც, რომ საჯარიმო თანხების რაოდენობა ისე გადანაწილდეს, რომ კლინიკების ფუნქციონირებას ხელი არ შეეშალოს ან არ შეიზღუდოს სამედიცინო დაწესებულებების მუშაობა.