ზურაბ ჯაფარიძის განცხადებით, თუ ოპოზიციასა და ქართულ ოცნებას შორის რაიმე შეთანხმება არ მიიღწევა, ოპოზიცია პარლამენტში არ შევა.

"თუ მოლაპარაკების მაგიდასთან რაიმე შეთანხმება არ მიიღწევა, ოპოზიციური პარტიები არ შედიან პარლამენტში. პრეზიდენტმა დანიშნა პარლამენტის პირველი სხდომა, სამი დღეა დარჩენილი, შესაბამისად, მნიშვნელოვანი შეხვედრაა", — განაცხადა ზურაბ ჯაფარიძემ.

აშშ-ს ელჩი, კელი დეგნანი, ოპოზიციისა და სახელისუფლებო გუნდის წარმომადგენლებთან ერთად შეხვედრებს მართავენ, რათა პოლიტიკური კონსენსუსი შედგეს და კრიზისი, რომელიც 31 ოქტომბრის არჩევნებს მოჰყვა, განიმუხტოს.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

დღეს კი გავრცელდა ინფორმაცია, რომ ზოგიერთი ოპოზიციონერი პარლამენტში შესვლას აპირებს. ამ დროისთვის, ოპოზიციაში აცხადებენ, რომ შესვლას არ აპირებენ და თუ ვინმე აპირებს, ეს მისი პირადი პასუხისმგებლობაა.