გამარჯვებული საქართველოს ლიდერის, ირაკლი ოქრუაშვილის განცხადებით, მმართველ პარტიასა და ოპოზიციონერი ლიდერების ნაწილს შორის ფარული მოლაპარაკებები მიმდინარეობდა. TV პირველთან საუბარში ოქრუაშვილმა თქვა, რომ საუბარია დაახლოებით 6-7 ადამიანზე.

"აღმოჩნდა, რომ თურმე პარალელური მოლაპარაკებებიც მიდის გარკვეულ დეპუტატობის კანდიდატებსა და ხელისუფლებას შორის. ეს ვერ დაიმალება დიდხანს. რამდენიმე დღეში მომსწრე უნდა გავხდეთ გადაწყვეტილების მიღების, ამ ადამიანების მხრიდან, რომ რას აპირებენ — შედიან თუ არა პარლამენტში!? დაახლოებით 6-7 ადამიანია, არ მინდა ახლა სახელებზე და გვარებზე ვისაუბრო. ჯობია ერმა მათი ბაგეებიდან შეიტყოს მათი საგმირო საქმეების შესახებ", — განაცხადა ოქრუაშვილმა.

მისი თქმით, ოპოზიციის საერთო ბრძოლაში მისი წვლილიც საკმაოდ დიდია და კონკრეტული ადამიანების გადაწყვეტილების ცვლილების გამო, არ აპირებს ის დაკარგოს ერთიანი ოპოზიციური ბრძოლის შედეგები.

"ყველაზე ცუდი კიდევ ის არის, რომ თურმე აპირებენ, რომ პირველ სხდომას არ დაესწრონ და მერე, შემთხვევით, ჩუმად შეუერთდნენ პარლამენტს. არ გამოვა ასე. თუ ვინმე აპირებს, რომ საკუთარი პოლიტიკური მომავალი დაისამაროს, ღმერთმა ხელი მოუმართოს, მაგრამ, ეს იყო ერთობლივი ბრძოლა, რომელშიც პირადად მე გავიღე საკმაოდ მნიშვნელოვანი წვლილი, ციხეში ვიჯექი, ისე, როგორც ძალიან ბევრმა ადამიანმა და მე არ ვაპირებ, რომ ეს ყველაფერი დაიკარგოს ვიღაცის თბილის სავარძლის სანაცვლოდ", — აცხადებს ოქრუაშვილი.

გამარჯვებული საქართველოს ლიდერმა, დღეს საკუთარ ფეისბუქ გვერდზე დაწერა, რომ ოპოზიციონერი დეპუტატების ნაწილი, ბოიკოტის მიუხედავად, მაინც შევა პარლამენტში.

მეათე მოწვევის პარლამენტის პირველი სხდომა 11 დეკემბერს გაიმართება.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

გაიგეთ მეტი: