საქართველოს მთავრობამ დღეს, 24 იანვრის სხდომაზე ქალთა მიმართ და ოჯახში ძალადობის წინააღმდეგ საკანონმდებლო პაკეტი დაამტკიცა, რომელიც სტამბოლის კონვენციის რატიფიცირებისთვის მომზადდა.

საკანონმდებლო ინიციატივა საქართველოს პარლამენტს გაეგზავნება დასამტკიცებლად. ცვლილებების დამტკიცების შემდეგ, ახალი დანაშაულის, ადევნების დეფინიცია განისაზღვრება, რომელიც ითვალისწინებს 2 წლამდე თავისუფლების აღკვეთას, ასევე, იძულებითი სტერილიზაციისა და ქალის გენიტალიების დასახიჩრების კრიმინალიზაცია მოხდება.

გარდა ამისა, შეიცვლება ქალთა მიმართ ძალადობრივი დანაშაულის დამამძიმებელ გარემოებათა ჩამონათვალიც. კერძოდ, ძალადობრივი დანაშაულის დამამძიმებელ გარემოებად ჩაითვლება, თუ ის ჩადენილია მეუღლის, ან ყოფილი მეუღლის, პარტნიორის, უმწეო მდგომარეობაში მყოფი პირის მიმართ, არასრულწლოვნის თანდასწრებით, ან მის მიმართ - განმეორებით, ჯგუფურად, იარაღის მუქარით/გამოყენებით, ფიზიკური ან ფსიქიკური ზიანის მიყენებით, განსაკუთრებული სისასტიკით მსგავსი დანაშაულებისთვის ნასამართლევი პირის მიერ.

ქალთა მიმართ ძალადობის გარდა, სტამბოლის კონვენცია ლესბოსელ, ბისექსუალ, ტრანსგენდერ, შშმ, ეთნიკურ და რელიგიურ უმცირესობათა წარმომადგენელი ქალების დაცვის საკითხებსაც არეგულირებს.

უფრო ვრცლად საკანონმდებლო პაკეტისა და მის ირგვლივ არსებული მოსაზრებების შესახებ შეიძლიათ წაიკითხოთ აქ.