კახეთში რამდენიმე დღის წინ მოსული სეტყვის დროს, დელტას სეტყვის საწინააღმდეგო სისტემის გაუმართავობასთან დაკავშირებით, დელტას გენერალური დირექტორი, უჩა ძოძუაშვილი თანამდებობიდან თავდაცვის მინისტრის ბრძანებით გადააყენეს.

როგორც თავდაცვის სამინისტროში On.ge-ს განუცხადეს, თავდაცვის სამინისტროს გენერალური ინსპექცია სწავლობდა კახეთის რეგიონში სეტყვის საწინააღმდეგო საშუალებების გამოყენებასთან დაკავშირებით არსებული მდგომარეობას. ჯერჯერობით, სამინისტროში არ აკონკრეტებენ, რა ტიპის დარღვევები გამოიკვეთა და კონკრეტულად რის გამო გაათავისუფლეს ძოძუაშვილი. სამინისტროს განცხადებით, ამის შესახებ ინფორმაციას, უახლოეს მომავალში გაავრცელებენ.

სახელმწიფო სამხედრო სამეცნიერო-ტექნიკურ ცენტრ დელტაში, ჯერჯერობით, არ მისულა დირექტორის გათავისუფლების შესახებ მინისტრის ბრძანება.

14 მაისს კახეთში მოსულმა სეტყვამ რამდენიმე სოფელში ვენახები და ხეხილის ბაღები მთლიანად გაანადგურა. როგორც ადგილობრივები აცხადებდნენ, დელტას სეტყვის საწინააღმდეგო სისტემამ ხარვეზებით იმუშავა, რის გამოც, ზარალის თავიდან აცილება ვერ მოხდა.