იუსტიციის სამინისტროს სისტემაში თითოეული მოქალაქის, მათ შორის გია ცერცვაძის პირადი მონაცემები დაცულია. ასე გამოეხმაურა საქართველოს იუსტიციის მინისტრი, თეა წულუკიანი უკრაინაში საქართველოს მოქალაქის გია ცერცვაძის დაკავების საკითხს.

მისი თქმით, იუსტიციის სამინისტროში არსებულ ინფორმაციაზე ხელი არავის მიუწვდება, გარდა კანონით გათვალისწინებული შემთხვევებისა.

„რაც შეეხება თვითონ ამ წუთში მიმდინარე პროცესს და პროცედურებს ჩვენი მოქალაქე [გია] ცერცვაძის წინააღმდეგ უკრაინაში, ერთადერთი შემიძლია გითხრათ, რომ ჩვენმა სახელმწიფომ უკვე განახორციელა ნაბიჯები, რომ ბატონი ცერცვაძის ინტერესები იქნეს უკრაინის ტერიტორიაზე დაცული. ეს არის ის, რაც ამ წუთში შემიძლია გითხრათ. ჩემი უმორჩილესი თხოვნა იქნებოდა, რომ რაც შეიძლება თავი შევიკავოთ აჟიოტაჟისგან ამ თემის გარშემო, რადგან ეს არ ემსახურება მოქალაქე ცერცვაძის ინტერესებს. თანამშრომლობა მიმდინარეობს უკრაინასთან და დაველოდოთ შედეგებს,“ - აღნიშნა იუსტიციის მინისტრმა.

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში დააპატიმრეს.

რუსთავი 2-ის ინფორმაციით, რუსეთიდან უკრაინაში გადაგზავნილ საქმის მასალებში წერია, რომ ქართველ ჯარისკაცს 2003 წელს რუსეთში ჩადენილი მკვლელობისთვის ეძებენ.