არასრულწლოვანი შვილისა და მისი მეგობრების მიმართ გარყვნილ ქმედებაში ბრალდებულ 40 წლის კაცს ბრალი 4 მუხლით წარუდგინეს. გამოძიება მას გარყვნილ ქმედებას, ოჯახის წევრის მიმართ გარყვნილ ქმედებას, არასრულწლოვნის მიმართ ოჯახში ძალადობას და წინასწარი შეცნობით 14 წლის ასაკს მიუღწეველთან გარყვნილ ქმედებას ედავება.

"შინაგან საქმეთა სამინისტროში მიმდინარე გამოძიებით დადგინდა, რომ 2020 წლის ივნისიდან სექტემბრამდე ქ. თბილისში, გ.გ.-მ სხვადასხვა დროს 4 არასრულწლოვან გოგოსთან, მათ შორის საკუთარ შვილთან გარყვნილი ქმედება ჩაიდინა. გამოძიებით ასევე დადგინდა, რომ გ.გ.-მ ფიზიკური ძალადობა განახორციელა მის არასრულწლოვან შვილზე", — აცხადებენ პროკურატურაში.

მას ბრალი წარდგენილი აქვს სისხლის სამართლის კოდექსის 141-ე მუხლის პირველი ნაწილით, 11 პრიმა 141-ე პრიმა მუხლის პირველი ნაწილით, 126-ე პრიმა მუხლის მეორე ნაწილის "ა" ქვეპუნქტით და 141-ე მუხლის მე-2 ნაწილის "ვ" ქვეპუნქტით. ამ დანაშაულების დამტკიცების შემთხვევაში კაცს 8-დან 12 წლამდე თავისუფლების აღკვეთა ემუქრება.

პროკურატურაში აცხადებენ, რომ ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით თბილისის საქალაქო სასამართლოს კანონით დადგენილ ვადაში მიმართავენ.

მათივე ინფორმაციით, სისხლის სამართლის საქმეზე გამოძიება გრძელდება.

ინფორმაცია იმის შესახებ, რომ არასრულწლოვანი შვილისა და მისი მეგობრების მიმართ გარყვნილი ქმედებისთვის 40 წლის კაცი დააკავეს, შსს-მ 3 დეკემბერს გაავრცელა. უწყებაში ამბობენ, რომ ბრალდებული შვილისა და მისი თანატოლი მეგობრების მიმართ სჩადიოდა გარყვნილ ქმედებებს, რომელთა ნაწილს ვიდეოზე იღებდა და ეს ვიდეოჩანაწერები საქმეში წარმოდგენილია ნივთმტკიცების სახით. ასევე, შსს-ში აცხადებენ, რომ ბრალდებულს არასრულწლოვნებთან სექსუალური ხასიათის მიმოწერაც ჰქონდა.