ინფექციური საავადმყოფოს დირექტორის, თენგიზ ცერცვაძის განცხადებით, მისი და ჯანდაცვის მინისტრის, ეკატერინე ტიკარაძის პირადი ურთიერთობა კარგი არ იყო, მაგრამ მისი საქმიანობით კმაყოფილია.

"დიახ, კმაყოფილი ვარ. ვიცი იყო კრიტიკული შენიშვნები, დაპირისპირებები, მაგრამ მე ისიც ვიცი, რა შეუძლია ჯანდაცვის მინისტრს და ჯანდაცვის სამინისტროს და რას ვაკეთებდით წინათ, სხვა ჯანდაცვის მინისტრების პირობებში. მიმაჩნია, რომ მეტის გაკეთება ძნელია. ახლა კმაყოფილი, მე თუ მკითხავთ, პირადად არ ვარ, ჩვენი პირადი ურთიერთობა კარგი არ იყო, ახლა ნორმალურია. მე ვტოვებდი სამსახურს და მივდიოდი", — განაცხადა ცერცვაძემ რუსთავი 2-თან.

მისივე თქმით, ეკატერინე ტიკარაძესთან ასეთი ურთიერთობის მიზეზი, ძირითადად, დაკავშირებული იყო იმასთან, რომ 10 წელია ინფექციურ საავადმყოფოს შენობა არ აქვს და არაადამიანურ პირობებში მუშაობა უწევდათ. ცერცვაძე ამბობს, რომ ეს პრობლემა პრემიერმინისტრ გიორგი გახარიას დახმარებით გადაიჭრა.