ანჯელინა ფრიდმანი ნამდვილი მებრძოლია.

როცა პატარა იყო, ის 1918 წლის ესპანური გრიპის პანდემიას გადაურჩა. ცხოვრების განმავლობაში მან დაამარცხა კიბო, შინაგანი სისხლდენა და სეფსისი. აპრილში მან კორონავირუსსაც მოუღო ბოლო — ვირუსს, რომელმაც მსოფლიოს მასშტაბით უკვე 1,5 მილიონი ადამიანის სიცოცხლე შეიწირა.

ახლა 102 წლის ნიუ-იორკის მცხოვრებმა ეს კიდევ ერთხელ გააკეთა. მისი შვილის, ჯოან მეროლას, თქმით, ის კორონავირუსის მეორე დიაგნოზს გადაურჩა.

"ჩემი უძლეველი დედის ტესტმა უარყოფითი პასუხი აჩვენა", — თქვა მეროლამ დედის ხელმეორედ განოჯანმრთელების შემდეგ.

ფრიდმანის პირველი დიაგნოზი მარტში დაისვა, როდესაც ის უმნიშვნელო სამედიცინო პროცედურისთვის იყო საავადმყოფოში. დაბრუნებისას მისი ტესტის პასუხი დადებითი იყო.

იმ დროს მან საავადმყოფოში ერთი კვირა გაატარა, სანამ საკუთარ ოთახში იზოლაციაში დაბრუნდებოდა. რამდენიმე კვირის განმავლობაში მას ტემპერატურა ხან მაღალი ჰქონდა, ხან ნორმის ფარგლებში, საბოლოოდ კი, 20 აპრილს, მან ვირუსი დაამარცხა და ტესტის პასუხიც უარყოფითი მოვიდა.

ოქტომბრის მიწურულს მეროლას მოხუცებულთა თავშესაფრიდან დაურეკეს და უთხრეს, რომ "მას ისევ დაუდგინდა COVID-19".

"მას სიმპტომები ჰქონდა — სიცხე, მშრალი ხველა. ფიქრობდნენ, რომ შეიძლებოდა გრიპიც ჰქონოდა", — თქვა მეროლამ.

იქიდან გამომდინარე, რომ თავშესაფრის სულ უფრო და უფრო მეტი თანამშრომელი და რეზიდენტი ხდებოდა ავადა, მეროლამ თქვა, რომ შედარებით ხანდაზმული რეზიდენტები იზოლაციაში გადაიყვანეს. ის ყოველდღიურ განახლებებს იღებდა დედის მდგომარეობის შესახებ, სანამ 17 ნოემბერს არ მიიღო საბოლოო პასუხი — ფრიდმანის ტესტმა უარყოფითი აჩვენა, ანუ მან მეორედ დაამარცხა კორონავირუსი.

ფრიდმანი იზოლაციიდან გამოიყვანეს და თავის ჩვეულ ოთახში დააბრუნეს. მართალია, მას სმენა დიდწილად დაკარგული აქვს, მხედველობა კი — ძალიან გაუარესებული, მაგრამ ის სიცოცხლით მაინც ტკბება.

ფრიდმანის ენთუზიაზმს წინ არაერთი სირთულე უძღოდა.

1918 წელს ანჯელინა იმ გემზე დაიბადა, რომელსაც იმიგრანტები იტალიიდან ნიუ-იორკში გადაჰყავდა. ეს 1918 წლის ესპანური გრიპის პანდემიის შუაში ხდებოდა. სავარაუდოდ, ბავშვს გრიპი არ შეხებია.

დედამისი მშობიარობისას გარდაიცვალა, ანჯელინაზე კი მისი ორი და ზრუნავდა, სანამ ნიუ-იორკში, ბრუკლინში, მცხოვრებ მამასთან არ ჩააღწიეს.

მეროლას დედა და მამა კიბოს ერთდროულად ებრძოდნენ, თუმცა მამამისი გარდაიცვალა. ფრიდმანი 11 შვილიდან ერთ-ერთი იყო და ის ერთადერთია, ვინც დღემდე გადარჩა.

ფრიდმანი დღესაც კი გარშემომყოფებისთვის ბედნიერებისა და გართობის წყაროა. მას ძალიან უყვარს ქსოვა და მნახველებისთვის ბევრ სხვადასხვა რამეს ქსოვს ხოლმე. 101-ე იუბილეზე მას დიდი წვუელება მოუწყეს, წინა წელს კი გამოსაშვები საღამოს დედოფალიც გახდა.

"ის ყველაზე ასაკოვანი ადამიანი არ არის, ვინც კოვიდი დაამარცხა, მაგრამ, სავარაუდოდ, ის ყველაზე ასაკოვანი ადამიანია, ვინც ეს ორჯერ მოახერხა", — თქვა მეროლამ.