ბევრმა მაყურებელმა კარგად იცის, რომ 2019 წელს საკულტო სერიალ სასოწარკვეთილი დიასახლისების ვარსკვლავს, ფელისიტი ჰოფმანს კოლეჯის სკანდალის საქმეში მონაწილეობისთვის 14-დღიანი პატიმრობა მიესაჯა.

ამ ფაქტიდან ერთ წელზე ცოტა მეტი ხნის გასვლის შემდეგ კი მსახიობი პირველ როლზე დაამტკიცეს: ტელეკომპანია ABC-ის მომავალ კომედიაში ის მთავარ როლს შეასრულებს.

მომავალი სერიალის სცენარისტი სატელევიზიო შოუ The Bold Type-ის პროდიუსერი ბეკი ედვარდსი იქნება და მისი ახალი პროექტის სიუჟეტი კალათბურთის გუნდის მფლობელის, სუზან სავაჯის რეალური ისტორიით იქნება შთაგონებული.

ფელისიტი ჰოფმანთან ერთად კომედიურ შოუში ითამაშებს ზაკ გოტზაგენიც, რომელსაც მაყურებლები ასევე 2019 წლის კომედიურ დრამაში The Peanut Butter Falcon შესრულებული როლით იცნობენ.

ფელისიტი ჰოფმანი სერიალში სასოწარკვეთილი დიასახლისები.

ფოტო: ABC

ემის ჯილდოს მფლობელმა და ოსკარის ნომინანტმა მსახიობმა ფელისიტი ჰოფმანმა 2017 წელს $15 000 გადაიხადა იმისთვის, რომ თავისი შვილის გამოცდის შედეგები საიდუმლოდ გასწორებულიყო, რათა მას უნივერსიტეტში ჩაებარებინა. დანაშაულებრივი სქემა რამდენიმე თვის შემდეგ გამოაშკარავდა, რომლის მიხედვითაც, მდიდარი ოჯახები შვილების სასწავლებელში მოსახვედრად ფულს იხდიდნენ. დანაშაულში სულ 50-მდე მონაწილე პირი იკვეთებოდა და მათ შორის იყო ჰოფმანიც.

"სრულიად ვიღებ ამ პასუხისმგებლობას და ძალიან მრცხვენია. მრცხვენია და ვნანობ იმას, რაც გავაკეთე. მრცხვენია იმის, თუ რა ზიანი მივაყენე ჩემს შვილს, ოჯახს, მეგობრებს, კოლეგებსა და საგანმანათლებლო სისტემას. მინდა დიდი ბოდიში მოვუხადო იმ სტუდენტებს, რომლებიც დაუღალავად შრომობენ იმისთვის, რომ კოლეჯში ჩააბარონ, ასევე მათ მშობლებს, რომლებიც ყველაფერს აკეთებენ თავიანთი შვილების მხარდასაჭერად", — ბრალი აღიარა მსახიობმა და დაკისრებული სასჯელიც მოიხადა.

მოგვიანებით კი მისმა შვილმა, სოფია მეისიმ SAT-ის ტესტის ხელმეორედ ჩააბარა და პრესტიჟულ უნივერსიტეტშიც ჩაირიცხა: ის პენსილვანიაში, კარნეგი-მელონის უნივერსიტეტში სწავლობს.