პარიზში პოლიციამ მომიტინგეების წინააღმდეგ ცრემლსადენი გაზი გამოიყენა და ათობით ადამიანი დააკავა. ინფორმაცია ამის შესახებ BBC-მ გაავრცელა.

მომიტინგეები აპროტესტებენ ახალ კანონპროექტს, რომლის თანახმადაც, სამსახურებრივი მოვალეობის შესრულებისას პოლიციის ფოტო ან ვიდეო გადაღება სისხლის სამართლის დანაშაულად მიიჩნევა.

"კანონპროექტი ძირს უთხრის პრესის თავისუფლებას; ინფორმაციის მიღებისა და გაცემის თავისუფლებას, ასევე, გამოხატვის თავისუფლებას", — განაცხადა საპროტესტო გამოსვლების ერთ-ერთმა ორგანიზატორმა.

პოლიციასა და მოქალაქეებს შორის შეტაკება მას შემდეგ დაიწყო, რაც პროტესტის მონაწილეებმა პოლიციელებს ქვები დაუშინეს. დაიწვა ავტომობილები და რამდენიმე გაზეთის ჯიხური.

ქუჩაში გამოსული ხალხი ამბობს, რომ ახალი კანონპროექტი ზღუდავს პრესის თავისუფლებას, რომელიც პოლიციის სისასტიკეს ამხელს. ამის საპირწონედ კი მთავრობა აცხადებს, კანონპროექტი პოლიციელებს დაიცავს, რომ მათ შესახებ ინფორმაცია ონლაინ ბოროტად არ გამოიყენონ.

დემონსტრაციები შაბათს დაიწყო და პარიზის გარდა გავრცელდა — ბორდოში, ლილიში, მონპელიეში, ნანტისა და სხვა ქალაქებში.

გასული კვირის დასაწყისში გავრცელდა კადრები, სადაც სამი პოლიციელი შავკანიან მუსიკოს სცემს. გავრცელებული ინფორმაციის თანახმად, პოლიციელები მუსიკოს რასისტულ ნიადაგზე უსწორდებიან. აღნიშნულ კადრებს საფრანგეთის პრეზიდენტმა, ემანუელ მაკრონმა მიუღებელი და სამარცხვინო უწოდა.

ამ ეტაპზე პოლიციელები იდენტიფიცირებული არიან, მათ უფლებამოსილება შეუჩერდათ და საქმეზე გამოძიება მიმდინარეობს.

ახალ კანონპროექტს პარლამენტის ქვედა პალატამ მხარი გასულ კვირას დაუჭირა და ახლა სენატისგან დამტკიცებას ელოდება. აღნიშნულის თანახმად, პოლიციელის ფოტო-ვიდეო გადაღება სისხლის სამართლის დანაშაულად მიიჩნევა, რადგან ის პოლიციელის ფსიქოლოგიური ან ფიზიკური დაზიანების საფრთხეს შეიცავს. კანონდამრღვევს კი ერთწლიანი პატიმრობა ან 45 000 ევროს ოდენობის ჯარიმა ემუქრება.

მთავრობის მტკიცებით, კანონპროექტი მედიის ან მოქალაქეების თავისუფლებას არ ზღუდავს და მხოლოდ პოლიციელებს იცავს, რასაც ოპონენტები არ ეთანხმებიან.

საზოგადოების კრიტიკისა და გამოსვლების ფონზე საფრანგეთის პრემიერმინისტრმა განაცხადა, რომ კანონპროექტის მუხლის შესწორების მიზნით კომისიას მოიწვევს.