ჩოხატაურის ერთ-ერთ ქვის სამტეხ საამქროში 33 წლის მუშა გარდაიცვალა. არსებული ინფორმაციით, ის საავადმყოფოში გადაიყვანეს, თუმცა მისი გადარჩენა ვერ მოხერხდა. TV პირველის ცნობით, მუშა ცემენტის საზელ აპარატში გასაწმენდად ჩავიდა, რა დროსაც აპარატი ჩაერთო და მრავლობითი დაზიანება მუცლის ღრუში მიიღო.

შინაგან საქმეთა სამინისტროში On.ge-ს უთხრეს, რომ მომხდარზე გამოძიება სისხლის სამართლის კოდექსის 240 მე-2 ნაწილით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს, რასაც ადამიანის სიცოცხლის მოსპობა ან სხვა მძიმე შედეგი მოჰყვა.