სამოქალაქო პლატფორმა არა-ფობიას! მოუწოდებს ხელისუფლებას, როგორც ნებისმიერი შეზღუდვა, ასევე მისგან გამონაკლისი დააწესოს თანასწორობისა და სამართლებრივი სახელმწიფოს პრინციპების განუხრელი დაცვით და არ შექმნას დისკრიმინაციის ახალი პრეცედენტი. ამ ფორმით არასამთავრობო ორგანიზაციები ეხმიანებიან მთავრობის გადაწყვეტილებას იმის შესახებ, რომ გადაადგილების შეზღუდვა მხოლოდ მართლმადიდებულ შობაზე მოიხსნება.

არა-ფობიას მიიჩნევს, რომ მსგავსი გამონაკლისი რელიგიის ნიშნით დისკრიმინაცია და ხელისუფლების კიდევ ერთი განაცხადია, რომ ის არ განიხილავს რელიგიურ უმცირესობებს თანასწორუფლებიან მოქალაქეებად.

"ამ მხრივ, განსაკუთრებით საგანგაშოა მაია ცქიტიშვილის განცხადება, რომელიც სამართლებრივი სახელმწიფოს პრინციპის საპირისპიროდ (რაც მოიაზრებს უმცირესობათა უფლებების პატივისცემასა და დაცვას)[1], ცხადად მიუთითებს, რომ ხელისუფლება გადაწყვეტილებებს მხოლოდ უმრავლესობის პერსპექტივიდან იღებს. ახლა, როდესაც უაღრესად მნიშვნელოვანია კონსოლიდაცია და ყველას თანასწორუფლებიანობაზე მკაფიო ხაზგასმა, ხელისუფლება, მსგავსი განცხადებებით ადამიანებს პირველ და მეორეხარისხოვან მოქალაქეებად ყოფს და კიდევ უფრო აღრმავებს უსამართლობის განცდას", — წერია განცხადებაში.

მათივე თქმით, გასათვალისწინებელია, რომ ეს არ არის პირველი შემთხვევა, როდესაც პანდემიის პერიოდში საქართველოს ხელისუფლების მაღალი თანამდებობის პირები აკეთებენ ანტიკონსტიტუციურ განცხადებებს.

"გაზაფხულზე პრემიერ-მინისტრმა განაცხადა, რომ საქართველო მართლმადიდებლური სახელმწიფოა, რითაც ხაზი გაუსვა ერთი აღმსარებლობის უპირატესობას და უგულვებელყო სახელმწიფოსა და რელიგიის ურთიერთდამოუკიდებლობის ფუნდამენტური პრინციპი", — აცხადებენ ისინი.

მათივე თქმით, ხელისუფლების გადაწყვეტილებებმა და განცხადებებმა კიდევ ერთხელ გამოაჩინა პრემიერის დაქვემდებარებაში მოქმედი რელიგიის საკითხთა სახელმწიფო სააგენტოს ნეგატიური როლი.

"სააგენტოს მანდატი პრემიერისა და მთავრობისთვის რელიგიის თავისუფლების საკითხებზე კონსულტაციას გულისხმობს, თუმცა, ამ უწყებამ არაერთხელ დაამტკიცა, რომ რელიგიიის თავისუფლებისა და რელიგიური გაერთიანებების თანასწორუფლებიანობის დაცვის ნაცვლად, ხელს უწყობს მართლმადიდებელი ეკლესიისთვის პრივილეგიების მინიჭებას. ეს კარგად გამოჩნდა პანდემიის დროს სახელმწიფოს მიერ მიღებულ გადაწყვეტილებებშიც", — აცხადებენ ისინი

სამოქალაქო პლატფორმა არა-ფობიას! მოუწოდებს საქართველოს მთავრობას:

• იმოქმედოს სეკულარიზმის, თანასწორობის და სამართლებრივი სახელმწიფოს კონსტიტუციური პრინციპების დაცვით და თანაბარი წესი გაავრცელოს ყველა რელიგიურ გაერთიანებაზე;
• გაიაზროს რელიგიის თავისუფლების მნიშვნელობა და მსგავსი გადაწყვეტილებების მიღებამდე, კონსულტაციები გამართოს რელიგიური ორგანიზაციების ფართო სპექტრთან.

მთავრობის მიერ დაწესებული ახალი შეზღუდვები მხოლოდ ორ შემთხვევაში იხსნება ახალი წლის ღამეს და შობის ღამეს, 6-7 იანვარს, როცა დღესასწაულს მართლმადიდებელი ეკლესია აღნიშნავს.

როგორც ვიცე-პრემიერი ამბობს, შობის ღამეს გამონაკლისი იმის გათვალისწინებით დაიშვა, რომ ეს მოსახლეობის უმეტეს ნაწილს შეეხება. მისივე თქმით, ისინი კონტაქტზე არიან სხვა კონფესიებთან, რომ მათი უფლება დაცული იყოს და სურვილის შემთხვევაში, მათზე დაუშვებენ საშვს.

ამავე თემაზე:

• რა შეზღუდვები იმოქმედებს ქვეყანაში — სრულად