თბილისში არსებული დიდი სავაჭრო ცენტრების ხელმძღვანელების განცხადებით, მთავრობის მიერ გამოცხადებულმა ე.წ. ლოკდაუნმა ისინი მწარე რეალობის წინაშე დააყენა. თბილისი ცენტრალის დირექტორის, ლევან ყარალაშვილის თქმით, ხელისუფლებასთან კომუნიკაციის დროს მხოლოდ წერტილოვან შეზღუდვებზე ესაუბრებოდნენ.

"არანაირი წინაპირობა იმ განაცხადზე, რაც გაკეთდა, რომ სავაჭრო ცენტრები იკეტებოდა, ხდებოდა სატრანსპორტო შეზღუდვა, არ არსებობდა. იყო საჯარო განცხადებები, კერძო კომუნიკაცია, სადაც გვეუბნებოდნენ, რომ ეს არ მოხდებოდა, თუმცა დავდექით მწარე რეალობის წინაშე. გვქონდა ინტენსიური კომუნიკაცია ხელისუფლებასთან და იქ იყო საუბარი მხოლოდ წერტილოვან შეზღუდვებზე, გრაფიკების შემცირება, რამდენიმე დღე კვირაში, თუმცა 24 საათში ეს ყველაფერი შეიცვალა და, ფაქტობრივად, ყველა აღმოვჩნდით სრული "ლოკდაუნის" წინაშე", — განაცხადა ყარალაშვილმა.

მისივე თქმით, ყოველი დაკეტილი დღე 6 ცენტრისთვის 10 მილიონი ზარალია.

თბილისში არსებული დიდი სავაჭრო ცენტრების წარმომადგენლები პრემიერმინისტრსა და ანტიკრიზისულ საბჭოს მიმართავენ. ეს სავაჭრო ცენტრებია:

  • გალერეა თბილისი;
  • თბილისი მოლი;
  • ისთ ფოინთი;
  • თბილისი ცენტრალი;
  • ქარვასლა;
  • სითი მოლი;
  • გლდანი მოლი.

კორონავირუსის შემთხვევათა მატების და შეზღუდვების ახალი ტალღის გამო საბჭომ 28 ნოემბრიდან 31 იანვრის პერიოდში არაერთი შეზღუდვა დააწესა. მათ შორის, გადაადგილებაზე, მუნიციპალურ და საქალაქთაშორისო ტრანსპორტზე, რესტორნებსა და ბაზრობებზე. 24 დეკემბრიდან 2 იანვრის პერიოდში ხდება შეზღუდვების ნაწილობრივი შემსუბუქება: კერძოდ, ქვეყნის მასშტაბით, იმუშავებენ სავაჭრო ცენტრები, ღია და დახურული ბაზრობები და აღდგება როგორც მუნიციპალური, ისე საქალაქთაშორისო ტრანსპორტის მუშაობა. 3 იანვრიდან 15 იანვრის პერიოდში აღდგება ყველა ის შეზღუდვა, რომელიც 24 დეკემბრამდე მოქმედებდა. ამ პერიოდში ცხადდება უქმე, დასვენების დღეები. ხოლო 16 იანვრიდან აღდგება მუნიციპალური და საქალაქთაშორისო ტრანსპორტის მუშაობა, სავაჭრო ობიექტებისა და ღია და დახურული ბაზრობების მუშაობა (გარდა შაბათ-კვირისა).

გაიგეთ მეტი ახალ შეღუდვებზე: