გირჩის ლიდერი, ზურაბ ჯაფარიძე ამბობს, რომ პარტიები არ უნდა იღებდნენ საბიუჯეტო დაფინანსებას. როგორც მან პალიტრა ნიუსის ეთერში განაცხადა, განსაკუთრებით არასწორია იმ პარტიის მიერ საბიუჯეტო დაფინანსების მოთხოვნა, რომელიც არ აღიარებს არჩევნების შედეგებს.

"საბოლოო ჯამში, ეს დაფინანსება არის მიბმული ცენტრალური საარჩევნო კომისიის მიერ შედგენილ შემაჯამებელ ოქმზე — იქ რა რიცხვები გიწერია. თუ იძახი, რომ ეს ოქმი არასწორია და ეს არჩევნები გაყალბდა, და ამას ვიძახით მთელი ოპოზიციური სპექტრი, მაშინ იმაზე დაფუძნებით რაღაცა დაფინანსებას არ უნდა ითხოვდე. არასწორია. გაუგებარია. მინიმუმ, აძლევ არგუმენტს ქართულ ოცნებას, რომ გამოვიდეს და თქვას, რომ ამათმა არჩევნები აღიარეს. და ზოგადადაც, საბიუჯეტო დაფინანსების გარეშე თუ არ შეგიძლია ბიძინას დამარცხება, მაშინ უნდა დაიხურო ქუდი და წახვიდე", — განაცხადა ზურაბ ჯაფარიძემ.

გირჩის ლიდერი ამბობს, რომ პარტია ისედაც, არჩევნების შედეგების აღიარების შემთხვევაშიც არ მოითხოვდა ამ თანხას, რადგან მიაჩნია, რომ საბიუჯეტო დაფინანსება უნდა გაუქმდეს.

"ეს დაფინანსება ზოგადად არის გასაუქმებელი. ეს დაფინანსება არის ერთ-ერთი მთავარი პრობლემა, რომელიც არსებობს ქართულ პოლიტიკაში. საბიუჯეტო დაფინანსების არსებობის გამო, ქართული პოლიტიკური სპექტრი არის გადაჭედილი ვითომ პოლიტიკური პარტიებით, რომელთაც რაღაცა კონკრეტული მიზნები, ხედვები, ღირებულებები და პრინციპები კი არ ამოძრავებთ და რაღაცის შეცვლა კი არ უნდათ მართლა, გულწრფელად ქვეყანაში, არამედ, ეს არის ჩვეულებრივი ბიზნესი. გადალახავ [ზღვარს], გახდები კვალიფიციური სუბიექტი, იმიტომ, რომ ვიღაცასთან ბლოკი გააკეთე, ან რაღაცა გააკეთე და მიიღებ დაფინანსებას, უფასო რეკლამას, იმას, ამას", — განაცხადა მან.

ცესკოს ინფორმაციით, საბიუჯეტო დაფინანსება ბოლო არჩევნების შედეგების მიხედვით 14 პარტიას ეკუთვნის, რომელთაგან მისი მიღება ცხრამ მოითხოვა. ეს პარტიებია:

  • ქართული ოცნება;
  • ერთიანი ნაციონალური მოძრაობა და მის ბლოკში შემავალი პარტიები (მოძრაობა სახელმწიფო ხალხისთვის, პროგრესი და თავისუფლება, რესპუბლიკური პარტია, ევროპელი დემოკრატები);
  • ევროპული საქართველო;
  • სტრატეგია აღმაშენებელი
  • კანონი და სამართალი.

დაფინანსების მოთხოვნით, ცესკოსთვის არ მიუმართავს ხუთ პარტიას:

  • გირჩი;
  • ლეიბორისტული პარტია;
  • ლელო;
  • მოქალაქეები;
  • პატრიოტთა ალიანსი.

გაეცანით პარტიების პოზიციებს საბიუჯეტო დაფინანსების მიღებაზე: