ქართული ოცნების აღმასრულებელი მდივნის, ირაკლი კობახიძის თქმით, ყველაზე მეტი ევროპულმა საქართველომ წააგო ამ არჩევნებში და ისინი "ლუზერებად" მოიხსენია. ამის შესახებ მან პალიტრანიუსის ეთერში ისაუბრა.

"გამოკვეთილია უკვე სურათი, ამ არჩევნებს ჰყავს მკაფიო ე.წ. ლუზერები, ვინც ყველაზე მეტი წააგო ამ არჩევნებში. ეს არის ევროპული საქართველო, რომლის მხარდაჭერა ჩამოვიდა 10-ზე მეტი პროცენტიდან 4-ზე ნაკლებ პროცენტამდე. იცით, რომ სულ ხუთი დეპუტატი შედის ამ პარტიის სახელით და მათგან 4, რეალურად ბოლომდე არაა დაკავშირებული ამ პოლიტიკური პარტიის ძირითად გუნდთან. აქედან გამომდინარე, აშკარად არის გამოკვეთილი, რომ ეს პოლიტიკური პარტია არ სარგებლობს ძლიერი პოზიციებით და მეტი მოტივაცია აქვთ დესტრუქციის თვალსაზრისით", — განაცხადა კობახიძემ.

კობახიძის თქმით, ერთადერთი წითელი ხაზია რიგგარეშე არჩევნები, და ამ ხაზს ისინი არ გადაკვეთენ. ამ წითელი ხაზის გათვალისწინებით ფიქრობენ, რომ ოპოზიციასთან შეთანხმება არის მიღწევადი.