ევროპული საქართველოს ერთ-ერთი ლიდერი, სერგი კაპანაძე, მმართველ პარტიასთან მოლაპარაკებების შემდეგ რაუნდზე საუბრისას ამბობს, რომ თუ ქართული ოცნება პოლიტპატიმრების ბედით ვაჭრობას დაიწყებს, ეს იქნება პოლიტიკური ტერორიზმი.

"თუ ისინი აპირებენ, რომ პოლიტიკური პატიმრების ბედით ივაჭრონ და ასე დააყენებენ საკითხს, რომ, ან ეს კრიზისი განმუხტეთ თქვენ, შემოდით პარლამენტში, თუ არა და პოლიტპატიმრებს არ გავათავისუფლებთო, რა თქმა უნდა, ეს არ გამოვა. ასე არ დაყენდება ეს საკითხი. ეს არის ჩვეულებრივი პოლიტიკური ტერორიზმი", — განაცხადა სერგი კაპანაძემ.

31 ოქტომბერს ჩატარებული საპარლამენტო არჩევნების შედეგებს ოპოზიცია არ აღიარებს. ბარიერგადალახული რვავე ოპოზიციური პარტია უარს ამბობს საპარლამენტო მანდატებზე. მათ მონაწილება არ მიიღეს მეორე ტურში, რომელიც 17 მაჟორიტარულ ოლქში გაიმართა.

8 ნოემბერს, პარლამენტთან გამართულ აქციაზე, ოპოზიციამ სამი მოთხოვნა გააჟღერა — ხელახალი არჩევნების დანიშვნა, ცენტრალური საარჩევნო კომისიის თავმჯდომარის, თამარ ჟვანიას გადადგომა და პოლიტპატიმრების გათავისუფლება.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს.

უკვე გაიმართა მოლაპარაკებების ორი რაუნდი. ოპოზიცია ამბობს, რომ ქართულ ოცნებას წარუდგინეს კონკრეტული წინადადება და შემდეგ ნაბიჯს სწორედ მმართველი პარტიისგან ელიან.

გაიგეთ მეტი: