თბილისის პირველი საუნივერსიტეტო კლინიკის დირექტორის, ლევან რატიანის თქმით, იმ ფაქტს, რომ ინფიცირებულთა რაოდენობა ქვეყანაში იზრდება, მრავალი მიზეზი აქვს და მტყუან-მართლის გარჩევის დრო არ არის. ამის შესახებ მან საზოგადოებრივი მაუწყებლის ეთერში, გადაცემა "პირად ექიმში" ისაუბრა.

"მართალია, დღეს ინფიცირებულთა რაოდენობა ჩვენს ქვეყანაში გაიზარდა, ამის უამრავი მიზეზი არსებობს, მტყუან-მართალის გარჩევაზე ამ ეტაპზე ლაპარაკიც ზედმეტია, დადგება მომენტი, ყველაფერს თავისი სახელი დაერქმევა, მაგრამ, ფაქტია, რომ ნაკლები ინფიცირებული უნდა გვყავდეს ქვეყანაში. მე არ ვარ არანაირი პოლიტიკური ძალის წარმომადგენელი და სანამ ექიმი ვიქნები, არ ვიქნები პოლიტიკაში, არც არავის დამცავი, მლანძღავი და ადვოკატი, მაგრამ ერთი რამ მინდა გითხრათ: საზოგადოებამ ამ დაავადების მოვლა უნდა ვისწავლოთ", — განაცხადა რატიანმა.

რამდენიმე დღის წინ ვიცე-პრემიერმა, მაია ცქიტიშვილმა განაცხადა, რომ ქვეყანაში კორონავირუსის დინამიკის ზრდა პოლიტიკურმა პრცესებმა და უპასუხისმგებლო აქციებმა გამოიწვია.

25 ნოემბერს საქართველოში კორონავირუსის 3 071 ახალი შემთხვევა დადასტურდა, გამოჯანმრთელდა — 3 366 , გარდაიცვალა — 34.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 114 889-ს. ჯამში გამოჯანმრთელებულთა რაოდენობა გაიზარდა 95 581-მდე. 2020 წლის 26 თებერვლიდან დღემდე სულ გვაქვს 1 085 გარდაცვალების შემთხვევა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: