ევროპული საქართველოს ერთ-ერთი ლიდერი, გიგა ბოკერია, აცხადებს, რომ საქართველოს მთავრობას, კერძოდ, ივანიშვილს, "ქარიშხალი ელის", რომელიც საკუთარი "უტიფარი" პოლიტიკით მოიმკეს. ამის შესახებ მან გადაცემა "დღის ნიუსრუმში" ისაუბრა.

"საქართველო იმ გზაზე არ დგას, სადაც ის ქვეყნები აღმოჩნდნენ, რომლებმაც დათმეს ეს ამბავი, გაატარეს ეს ფაზა, რომ არჩევნებს მნიშვნელობა არ აქვს. საზოგადოება არ და ვერ შეეგუება ამას და წინ ამ ხალხს: ხელისუფლებას, ივანიშვილს ამ სამარცხვინო ლიდერს ელის ქარიშხალი, რომელიც თვითონ მოიმკეს საკუთარი უტიფარი პოლიტიკით. ყველაფერს თავისი დრო აქვს. საზოგადოება ზოგჯერ რეაგირებს ამ ფორმით, ზოგი დროში იწელება, მაგრამ ძალიან ძვირი ფასის გადახდა მოუწევს ქვეყანას, სამწუხაროდ, მათი პოლიტიკის შედეგებიდან გამომდინარე ეკონომიკაში და ჯანდაცვაში", — განაცხადა ბოკერიამ.

31 ოქტომბრის საპარლამენტო არჩევნების შედეგებს ოპოზიცია არ აღიარებს და საპარლამენტო მანდატებზე უარს აცხადებენ. მათ არ მიიღეს მონაწილეობა 17 მაჟორიტარულ ოლქში გამართულ მეორე ტურებში. ოპოზიციური პარტიები ვადამდელი არჩევნების ჩატარებას ითხოვენ და ამ არჩევნების შედეგების გაბათილება სურთ. როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებდნენ, არ წასულიყვნენ არჩევნებზე.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

ამასთან, პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.