ევროპული საქართველოს ერთ-ერთი ლიდერი, სერგი კაპანაძე აცხადებს, რომ მიუხედავად საქართველოში ევროკავშირის წარმომადგენლობის პატივისცემისა, პარტია არ აპირებს მათი მოსაზრებების გათვალისწინებას და პარლამენტში შესვლას. კაპანაძე ამის მიზეზად ასახელებს პასუხისმგებლობას, რომელიც, მისივე თქმით, ქვეყნის მომავლის წინაშე აქვთ.

"ამ რეალობაში, როდესაც სრულიად ცალსახაა, რომ პარლამენტი არ არის ლეგიტიმური, ოპოზიციის მხრიდან მათი კონკრეტული მეგობრული მოსაზრების გათვალისწინება არ მოხდება, ანუ ჩვენ არ ვაპირებთ, რომ პარლამენტში შევიდეთ. პატივს ვცემთ მათ მოსაზრებებს, მაგრამ ასევე გვესმის, რომ ამ ქვეყნის მომავალის წინაშე პასუხისმგებლობა არის ჩვენზე", — განაცხადა კაპანაძემ.

კაპანაძე, ასევე, პასუხობს საერთაშორისო პარტნიორების მოწოდებებს, რომ ოპოზიციამ გამოიყენოს სახელმწიფო ინსტიტუტები საკუთარი მიზნების მისაღწევად. მისი თქმით, სახელმწიფო ინსტიტუტები არ რეაგირებენ ოპოზიციის მოთხოვნებზე.

"გვესმის მათი წუხილი იმ კრიზისის გამო, რაც ქვეყანაშია შექმნილი და ჩვენ, მთელი ეს პერიოდი მათ ვაწვდით ყველა ინფორმაციას, რატომ არ ხდება ინსტიტუტების ისე გამოყენება, როგორც მათ უნდათ — იმ მარტივი მიზეზის გამო, რომ ჩვენ ამ ინსტიტუტებს ვიყენებთ, მაგრამ რეაქცია ინსტიტუტების მხრიდან არის სრული უგულებელყოფა: არცერთი საჩივარი არ იქნა დაკმაყოფილებული, არცერთი მოთხოვნა, პრაქტიკულად, გადათვლასა და გაუქმებასთან დაკავშირებით არ იქნა დაკმაყოფილებული", — ამბობს სერგი კაპანაძე.

საქართველოში ევროკავშირის წარმომადგენლობის განცხადებით, ელოდებიან, რომ ყველა პარტია შეძლებს განსხვავებების გადალახვას და პარლამენტის ყველა არჩეული წევრი, მიუხედავად მათი მხრიდან საარჩევნო პროცესის განსხვავებულად შეფასებისა, პარლამენტში თავის ადგილს დაიკავებს.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

გაიგეთ მეტი: