ქართული ოცნების გენერალურ მდივანს, კახა კალაძეს სჯერა, რომ არჩევნების მეორე ტურში, რომელსაც ოპოზიცია ბოიკოტს უცხადებს, მისი პარტიის კანდიდატები გაიმარჯვებენ. ის კვლავ ამტკიცებს, რომ ოპოზიცია ამომრჩევლის მობილიზებას აპირებს.

"ჩვენი ამომრჩევლის მაქსიმალური მობილიზება მოხდება. მინდა მივმართო ჩვენს ამომრჩეველს, რომ მაქსიმალურად იაქტიურონ, როგორც პირველ ტურში. ოპოზიციის ლიდერები საუბრობენ არჩევნებში არმონაწილეობაზე, თუმცა, რა თქმა უნდა, ისინი ყველაფერს გააკეთებენ, რათა თავიანთი ამომრჩევლები მიიყვანონ საარჩევნო უბნებზე. შესაბამისად, ჩვენ მაქსიმალური აქტიურობა გვმართებს, რათა დამაჯერებლად გავიმარჯვოთ. მე მჯერა და დარწმუნებული ვარ, რომ ქართული ოცნების ყველა კანდიდატი გაიმარჯვებს მეორე ტურში", — განაცხადა კალაძემ იმედის ეთერში.

21 ნოემბერს მაჟორიტარი დეპუტატების არჩევისთვის მეორე ტური საქართველოს მასშტაბით 17 ოლქში გაიმართება: მთაწმინდა, კრწანისი; ვაკე; საბურთალო; ისანი; სამგორი; დიდუბე-ჩუღურეთი; ნაძალადევი; გლდანი; თელავი, ახმეტა, ყვარელი და ლაგოდეხი; მცხეთა, დუშეთი, თიანეთი და ყაზბეგი; რუსთავი, გარდაბანი; ხაშური, ქარელი; ზესტაფონი, ტყიბული, თერჯოლა, ბაღდათი; ქუთაისი; ზუგდიდი; ბათუმი; ხელვაჩაური, ქედა, შუახევი და ხულო.

პირველი ტურის შედეგებს ოპოზიცია არ აღიარებს და არჩევნების გაყალბებაზე საუბრობს. მათ მეორე ტურში მონაწილეობაზე უარი თქვეს და განაცხადეს, რომ არც პარლამენტში შევლენ. ტექნიკურად მათი სახელები ბიულეტენებში ჩაწერილი იქნება, თუმცა, როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებენ, არ წავიდნენ არჩევნებზე.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.