გირჩის ერთ-ერთი ლიდერის, ზურაბ ჯაფარიძის თქმით, მეორე ტურში დიდუბე-ჩუღურეთის მაჟორიტარულ ოლქში ქართული ოცნების კანდიდატმა, გია ვოლსკიმ უნდა გაიმარჯვოს, როგორც ეს კომუნისტური ტრადიციის მქონე ქვეყნებში ხდებოდა. ამის შესახებ მან მთავარი არხის ეთერში ისუბრა.

"დიდუბე-ჩუღურეთში მე მხარს ვუჭერ გია ვოლსკის. ყველა ხმა მან უნდა მიიღოს. ვინც მივა, ყველამ მხარი უნდა დაუჭიროს გია ვოლსკის, საუკეთესო კომუნისტურ ტრადიციებში, როგორც ეს ხდებოდა საბჭოთა კავშირში, როცა ერთი კანდიდატი იყო და მთელი ხმები მასთან მიდიოდა, ბატონი გიაც მინდა რომ ეგრე შევიდეს მაჟორიტარად პარლამენტში", — განაცხადა ჯაფარიძემ.

ოპოზიცია არ აღიარებს 31 ოქტომბერს ჩატარებული არჩევნების შედეგს და პარლამენტში შესვლაზე უარს აცხადებს. ისინი არ იღებენ მონაწილეობას მეორე ტურებშიც. საპარლამენტო არჩევნების მეორე ტური ხვალ, 21 ნოემბერს გაიმართება.