ნაციონალური მოძრაობის წევრის, ზაალ უდუმაშვილის თქმით, არჩევნების მეორე ტურის დღეს, 21 ნოემბერს მოდელირებული საბჭოთა კავშირის დღე იქნება.

ოპოზიციურმა პარტიებმა მეორე ტურის დღეს საერთო აქციები გააუქმეს. როგორც უდუმაშვილმა თქვა, ნებისმიერი აქციის შემთხვევაში არჩევნებს პოლიტიკური მნიშვნელობა მიენიჭებოდა და სრულ იგნორირებაზე შეთანხმდნენ.

"იმ ახალგაზრდა თაობას, რომელსაც არ უცხოვრია საბჭოთა კავშირში და არ იცის, რა არის საბჭოთა კავშირი, ხვალ ეძლევა უნიკალური შანსი, ერთი დღე იცხოვროს საბჭოთა წყობილებაში. ნახოს, ირჩევდნენ ერთპარტიულ პარლამენტსა და ერთპარტიულ ხელისუფლებას. ხვალ იქნება ერთი დღე, ასე ვთქვათ, მოდელირებული საბჭოთა კავშირის", — თქვა ზაალ უდუმაშვილმა.

რამდენიმე დღის განმავლობაში ოპოზიციის წარმომადგენლები აცხადებდნენ, რომ არჩევნების მეორე ტურის დღეს საპროტესტო ღონისძიებებს გეგმავდნენ. აქციის ფორმებთან დაკავშირებით ოპოზიციის ლიდერები ლელოს ოფისში რამდენიმე დღის განმავლობაში მსჯელობდნენ.

საპარლამენტო არჩევნების მეორე ტური 21 ნოემბერს გაიმართება. ოპოზიცია პირველი ტურის შედეგებს არ აღიარებს, არც მეორე ტურში აპირებს მონაწილეობას და არც პარლამენტში გეგმავს შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები დაიწყო. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში ამბობენ რიგგარეშე არჩევნების ჩატარებას არც განიხილავენ.