აშშ-ს ელჩი საქართველოში კელი დეგნანი ამბობს, რომ არჩევნებთან დაკავშირებით გადაწყვეტილება არა აშშ-მ და ევროკავშირმა, არამედ საქართველოს პოლიტიკურმა ლიდერებმა უნდა მიიღონ. ამის შესახებ მან ჟურნალისტებს ევროკავშირის კავშირის ელჩთან, კარლ ჰარცელთან მისვლისას განაცხადა.

პოლიტიკური პარტიების მოლაპარაკებებსა და მუშაობას კელი დეგნანი პოზიტიურ ნიშანს უწოდებს.

"ეს ამერიკის შეერთებულმა შტატებმა და ევროკავშირმა არ უნდა გადაწყვიტონ, ეს უნდა გადაწყვიტონ საქართველოს პოლიტიკურმა ლიდერებმა. ისინი მუშაობენ იმისთვის, რომ ეს საკითხი გადაიჭრას. ჩვენ მზად ვართ დავუჭიროთ ამას მხარი, სანამ ისინი მზად არიან კონსტრუქციულად იმსჯელონ", — განაცხადა დეგნანმა.

არჩევნების მეორე ტურამდე ერთი დღით ადრე ელჩებმა ოპოზიციის წარმომადგენლებთან ინდივიდუალური შეხვედრების გამართვა დაიწყეს. მანამდე ელჩები პოლიტიკურ პარტიებთან საერთო შეხვედრებს აწყობდნენ.

არჩევნებთან დაკავშირებით პოლიტიკური პარტიების ლიდერები აშშ-სა და ევროკავშირის ელჩებს რამდენჯერმე შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრის დეტალებზე პოლიტიკოსები არ საუბრობენ, თუმცა აღნიშნავენ, რომ მხარეების პოზიციები უცვლელია.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.