ქართული ოცნების აღმასრულებელი მდივნის, ირაკლი კობახიძის თქმით, თუ ამერიკის სახელმწიფო დეპარტამენტის კითხვები ხმების გადათვლის პროცესის გამჭვირვალობას ეხება, მიზეზი შეიძლება, არასათანადო ინფორმაცია იყოს. მისი თქმით, როცა ოჯახში დავა არსებობს, მეზობლის დასკვნებს არ უნდა დავეყრდნოთ.

"როცა ოჯახში რაღაცა დავა არსებობს, ხომ არ შეიძლება ჩვენ მეზობლის დასკვნას დავეყრდნოთ? როცა ვიცით, რომ ქმარი სცემს ცოლს. მეზობელში ვიგულისხმე საერთაშორისო დამკვირვებელი, რომელსაც ვიღაც აწვდის ინფორმაციას. რაზე მაქვს საუბარი — მთავარია ფაქტი, მთავარი ის არის, ქმარმა ცოლი სცემა თუ არ სცემა. მე გეუბნებით, რომ ქმარს ცოლი არ უცემია. ეს რას ნიშნავს — მე გეუბნებით იმას, რომ ამ პროცესს აკვირდებოდა ყველა პოლიტიკური პარტია და არასამთავრობო ორგანიზაცია. არის ეს პროცესი გამჭვირვალე მაშინ, თუ არ არის?", — აღნიშნა კობახიძემ რუსთავი 2-ის ეთერში.

საპარლამენტო არჩევნები საქართველოში 31 ოქტომბერს ჩატარდა. ოპოზიცია შედეგებს არ აღიარებს და ბოიკოტის რეჟიმშია — ისინი პარლამენტში არ შედიან. გუშინ საქართველოს ამერიკის სახელმწიფო მდივანი, მაიკ პომპეო ეწვია, მან ხელისუფლების წარმომადგენლებთან, სამოქალაქო სექტორთან და პატრიარქთან შეხვედრები გამართა. პარალელურად მიმდინარეობდა ოპოზიციის მდუმარე აქციაც.