საბოლოოდ, მაყურებლები Wonder Woman 1984-ის ნახვას წელს მაინც მოახერხებენ. ბევრი სპეკულაციის შემდეგ Warner Bros.-მა განაცხადა, რომ სუპერგმირული ფილმის მეორე ნაწილის პრემიერა ონლაინ HBO Max-ის სტრიმინგის სერვისზე 25 დეკემბერს შედგება და იმავე დღეს ის აშშ-ის კინოთეატრებშიც გაეშვება.

საერთაშორისო დონეზე, სადაც HBO Max ხელმისაწვდომი არ არის, Wonder Woman 1984 კინოთეატრებში ერთი კვირით ადრე გამოვა, 16 დეკემბერს. ფილმი HBO Max-ზე ერთი თვის განმავლობაში გაისტრიმება სერვისის გამომწერებისთვის დამატებითი გადასახადის გარეშე.

"ამ უპრეცედენტო დროების გასავლელად მოგვიწია, ჩვენი ბიზნესის წინ წაწევაში უფრო ინოვაციურები ვყოფილიყავით და თან ჩვენი ფანების სუპერმომსახურება გაგვეგრძელებინა. ეს საოცარი ფილმია, რომელიც დიდ ეკრანზე ნამდვილად ცოცხლდება, და, კინოჩვენებების საზოგადოების ჩვენს პარტნიორებთან მუშაობის შედეგად, ჩვენ ამ შესაძლებლობას აშშ-ის მომხმარებლებსაც მივცემთ იქ, სადაც კინოთეატრები ღიაა. გვესმის, რომ ბევრი ვერ მოახერხებს კინოთეატრში მისვლას პანდემიის გამო, ამიტომ გვსურს, მათ Wonder Woman 1984-ის ნახვა HBO Max-ის პლატფორმაზე შეძლონ", — განაცხადა WarnerMedia Studios-ის CEO-მ, ენ სერნოფმა.

ფილმის ტრადიციული გზით პრემიერაზე უარის თქმა საკმაოდ მოულოდნელია, რადგან Wonder Woman 1984 წლის ერთ-ერთი ყველაზე დიდი ფილმი უნდა ყოფილიყო, რომლის ბილეთების გაყიდვებიც პოტენციურად $1 მილიარდს გადააჭარბებდა. ფილმი, რომლის ბიუჯეტიც $200 მილიონია, თავდაპირველად კინოთეატრებში ზაფხულში უნდა გამოსულიყო. მიუხედავად ამისა, კორონავირუსის გამო ის არაერთხელ გადაიდო. ბევრი ეჭვის თვალით უყურებდა იმას, რომ Wonder Woman 1984-ს წელს 25 დეკემბერს გამოუშვებდნენ, რადგან აშშ-ის კინოთეატრების ნახევარი ჯერ კიდევ დახურულია, ხალხი კი კინოთეატრებში წასვლას თავს არიდებს. ინდუსტრიის ექსპერტები ვარაუდობდნენ, რომ Black Widow-ს, Fast & Furious 9-ის, No Time to Die-ისა და სხვა პოტენციური ბლოკბასტერების მსგავსად Wonder Woman 1984-ის პრემიერაც 2021 წლისთვის გადაიწევდა.

WarnerMedia-ს CEO ჯეისონ კილარმა ხაზი გაუსვა, რომ კომპანიისთვის კინოჩვენებები ძალიან მნიშვნელოვანია. პანდემიის დროს კინოთეატრები განსაკუთრებით მადლიერები იყვნენ კომპანია Warner Bros.-ის, რადგან სტუდიამ ზაფხულში საკმაოდ თამამი ნაბიჯი გადადგა და კინოთეატრებში კრისტოფერ ნოლანის Tenet გამოუშვა მიუხედავად იმ დიდი სირთულეებისა, რომელიც ფილმის შემოსავალს ელოდა.

"ჩვენ გვჯერა კინოთეატრების, რადგან მსოფლიოში ასობით მილიონი ფანი აფასებს ფილმების დიდ ეკრანებზე ნახვას. და მანამ, სანამ ფანებს კინოთეატრში სურთ ამ გამოცდილების მიღება, ჩვენ მათთან ვიქნებით და შესანიშნავი ფილმებით მოვამარაგებთ", — განაცხადა კილარმა.

Wonder Woman 1984-ის მომავალი წლისთვის გადადების ნაცვლად მისი HBO Max-ზე გაშვება ნიშნავს, რომ ფილმის შემოსავალი საგრძნობლად შემცირდება. თუმცა არსებობს იმის იმედი, რომ ეს მაყურებლებს HBO Max-ის გამოწერისკენ უბიძგებს, რომელიც საკმაოდ რთულ კონკურენციაშია Netflix-თან, Amazon Prime-სა და Disney Plus-თან. HBO Max-ის გამოწერა თვეში $15 ღირს.

თუ მსგავსი სიახლეები გაინტერესებს და, ზოგადად, კინოხელოვნება შენი საყვარელი სადისკუსიო თემაა, შემოგვიერთდი ფილმების ჯგუფში.