აშშ-ში საქართველოს ელჩის, დავით ბაქრაძის განცხადებით, აშშ-სთან თავდაცვისა და უსაფრთხოების თანამშრომლობა კიდევ უფრო გაღრმავდება. ამ საკითხზე მან რუსთავი 2-ის ეთერში ისაუბრა სამხედრო ბაზების გახსნაზე დასმული კითხვის პასუხად.

კერძოდ, კითხვაზე, იყო თუ არა პოპმეოსთან დღევანდელი შეხვედრების დროს ბაზების გასნაზე საუბარი, ის პასუხობს:

"თქვენ ნახეთ პრემიერმინისტრის დღევანდელი გასნით სიტყვაში მან ხაზგასმით აღნიშნა, რომ დღევანდელი ვითარების გათვალისწინებით, ჩვენთვის კრიტიკულად მნიშვნელოვანია უფრო მეტი და აქტიური მონაწილეობა ამერიკის შეერთებული შტატებისა საქართველოში. ჩვენ განვიხილეთ თავდაცვისა და უსაფრთხოების მიმართულებით ჩვენს ხელთ არსებული და უკვე ხელმოწერილი დოკუმენტების ფარგლებში შემდგომი ურთიერთობების გაღრმავების პერსპექტივები, მათ შორის შავი ზღვის უსაფრთხოების პერსპექტივას, მათ შორის საქართველოს თავდაცვის მხარდაჭერის პროგრამას. რასაკვირველია, მე ახლა კონკრეტულ დეტალებზე არ ვისაუბრებ, მაგრამ ჩვენი თავდაცვისა და უსაფრთხოების თანამშრომლობა კიდევ უფრო გაღრმავდება", — განაცხადა ბაქრაძემ.

უსაფრთხოებისა და საგარეო პოლიტიკის ქართველმა ექსპერტებმა აშშ-ს სახელმწიფო მდივანს, მაიკ პომპეოს საქართველოში აშშ-ს ჯარის განთავსების მოთხოვნით მიმართეს. ღია წერილი თბილისში სახელმწიფო მდივნის ჩამოსვლამდე ერთი დღით ადრე, 16 ნოემბერს გავრცელდა.