ევროპული საქართველოს საარჩევნო შტაბის ხელმძღვანელის, სერგი კაპანაძის განცხადებით პარტია გამოიხმობს საკუთარ წარმომადგენლებს საუბნო კომისიებიდან. კაპანაძის ინფორმაციით, საპარლამენტო არჩევნების მეორე ტურში, ჯამში, ევროპული საქართველოს 1922 კომისიის წვერი აღარ მიიღებს მონაწილეობას.

"ჩვენ მივიღეთ გადაწყვეტილება, რომ იმ 17 ოქლში, სადაც ტარდება მეორე ტურები, გამოვიხმოთ ჩვენი კომისიის წევრები. ჯამში ევროპული საქართველოს 1922 კომისიის წევრი აღარ იქნება კომისიებში მეორე ტურის დროს", — აცხადებს კაპანაძე.

კაპანაძის თქმით, კომისიის წევრების გამოთხოვის მიზანი არჩევნების არალეგიტიმურობის ხაზგასმაა.

"რაც უნდათ ის გადაწერონ, რაც უნდათ ის გააყალბონ და რაც უნდათ ის დახატონ ამ ოქმებზე. ჩვენი წარმომადგენლები იქ არ იქნებიან [...]

ეს არის კიდევ ერთი ნაბიჯი გადადგმული იმისკენ, რომ ეს არჩევნები თავიდან ბოლომდე იყოს არალეგიტიმური, რადგანაც ეს გზა აარჩია ივანიშვილმა. ამიტომ, ჩვენი კომისიის წევრები არ იქნებიან კომისიებში და ქართულ ოცნებას მარტო მოუწევს ამ ე.წ. მეორე ტურების ფორმალურად ჩატარება", — განაცხადა სერგი კაპანაძემ.

საპარლამენტო არჩევნების მეორე ტური შაბათს, 21 ნოემბერს ჩატარდება. ოპოზიცია 31 ოქტომბერს გამართულ არჩევნებს არალეგიტიმურ უწოდებს, მეორე ტურში მონაწილეობაზე უარს ამბობს და რიგგარეშე არჩევნების ჩატარებას ითხოვს.

გაიგეთ მეტი: