შერიგებისა და სამოქალაქო თანასწორობის საკითხებში სახელმწიფო მინისტრის აპარატის ინფორმაციით, 14 ნოემბერს ოკუპირებული ცხინვალის რეგიონიდან ე.წ. ერგნეთის გადასასვლელის გავლით, სამკურნალოდ გადმოიყვანეს ოკუპირებულ ახალგორში მცხოვრები, რომელიც კლინიკაში ტრანსპორტირებისას გარდაიცვალა.

უწყების ცნობით, მიუხედავად იმისა, რომ საქართველომ სამედიცინო ევაკუაციის მომზადების შესახებ ინფორმაციის მიღებისთანავე განახორციელა საჭირო პროცედურები, პაციენტის მდგომარეობა მძიმე იყო და იგი სასწრაფო სამედიცინო დახმარების მანქანაში გარდაიცვალა.

"ოკუპანტები მოქალაქეებს საქართველოს კონტროლირებად ტერიტორიაზე გადმოსვლის საშუალებას არ აძლევენ, რაც მათ კრიტიკულად მნიშვნელოვან ჯანდაცვის სერვისებზე წვდომას უზღუდავთ", — ნათქვამია განცხადებაში.

ოკუპირებული ახალგორი ერთ წელზე მეტია ჩაკეტილია. ე.წ. გადასასვლელი პუნქტების გაუქმებამ კი, უწყების განცხადებით, უკვე 16 ადამიანის სიცოცხლე იმსხვერპლა. შერიგებისა და სამოქალაქო თანასწორობის საკითხებში სახელმწიფო მინისტრის აპარატი მოუწოდებს საერთაშორისო ორგანიზაციებს და პარტნიორებს, გააძლიერონ ზეწოლა საოკუპაციო რეჟიმზე.