კორონავირუსის ვაქცინის შემქმნელი პროფესორის, უღურ შაჰინის ვარაუდით, ნორმალურ ცხოვრებას მომავალი წლის ზამთარში დავუბრუნდებით. ამის შესახებ ინფორმაციას BBC ავრცელებს.

პროფესორმა BBC-ის ერთ-ერთ შოუში საუბრისას განაცხადა, რომ მისი რწმენით, ვაქცინა ადამიანთა შორის ვირუსის გადაცემის რიცხვს და სიმპტომებს შეამცირებს.

"დარწმუნებული ვარ, რომ კორონავირუსის გადაცემა ასეთი ეფექტური ვაქცინით შემცირდება. შეიძლება, არა 90%-ით, მაგრამ 50%-ით მაინც. მაგრამ არ უნდა დაგვავიწყდეს, რომ ესეც შეუწყობს ხელს პანდემიის გავრცელების მკვეთრ კლებას", — განაცხადა მან.

გასულ კვირას Pfizer-ისა და BioNTech-ის ერთობლივმა პროდუქტმა იმედისმომცემი შედეგები აჩვენა. შემქმნელებმა განაცხადეს, რომ COVID-19-ის ახალი ვაქცინა 90%-ზე მეტი ეფექტიანობით გამოირჩევა.

ევროკავშირმა კომპანიასთან წინასწარი ხელშეკრულება უკვე გააფორმა და 300 მილიონი ვაქცინა წინასწარ შეიძინა. გარდა ამისა, 100 მილიონი ვაქცინის შენაძენი გააკეთა ამერიკის შეერთებულმა შტატებმაც.

რაც შეეხება საქართველოს, დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, ვაქცინის მისაღებად საქართველომ პირველი შენატანი 4 მილიონი აშშ დოლარი უკვე გადარიცხა. ჯამში კი მისი მიღება 17 მილიონი დოლარი ჯდება. გამყრელიძის ინფორმაციით, 700 000 ადამიანისთვის სამყოფი კორონავირუსის ვაქცინის დოზა უკვე შეუკვეთეს. ვაქცინის დამტკიცების შემდეგ კი, პირველ რიგში, რისკჯგუფებში შემავალი ადამიანები აიცრებიან