საქართველოში ამერიკის ელჩ კელი დეგნანთან ოპოზიციის შეხვედრა დასრულდა. როგორც სტრატეგია აღმაშენებლის ერთ-ერთმა ლიდერმა, გიორგი ვაშაძემ განაცხადა, თუ წინა გამოცდილებას დავაკვირდებით, თავიდან ძალიან მკაცრი პოზიციებია და შემდგომ არის, ხოლმე, გარკვეული პროგრესი და იმედს იტოვებს, რომ შემდეგი შეხვედრისთვის უფრო მეტი კონკრეტიკა იქნება.

"გადათვლა, ასე შემდეგ, პროცედურული საკითხები ჩაიხსნა, ამაზე ვეღარ ვისაუბრებთ იმიტომ, რომ ცესკომ ამ ფაქტის წინაშე დაგვაყენა. შემდგომ შეხვედრაზე რამდენიმე თემა, რაზეც შიძლება ვისაუბროთ, არის არჩევნების თარიღი და მასთან თანმდევი ორი მოთხოვნა. აღარ ვიხილავთ სხვა ვარიანტებს, რასაც ქართული ოცნება გვთავაზობდა. შემდეგი შეხვედრის ზუსტი თარიღი უცნობია", — განაცხადა გიორგი ვაშაძემ.

დღეს, 14 ნოემბერს ოპოზიციასა და მმართველ გუნდს შორის მოლაპარაკებების მეორე რაუნდი გაიმართა. შეხვედრა კვლავ აშშ-ს ელჩის, კელი დეგნანის რეზიდენციაში ჩატარდა და მას ევროკავშირის ელჩი, კარლ ჰარცელიც დაესწრო. პირველი შეხვედრის მსგავსად, ახლაც მოლაპარაკებებში ბარიერგადალახული ოპოზიციური პარტიის ლიდერები და პარლამენტის თავმჯდომარე, არჩილ თალაკვაძე ჩაერთნენ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე14 ნოემბერსაა დაგეგმილი.

ამავე თემაზე: