საბავშვო ევროვიზიის სიმღერის კონკურსზე წლეულს საქართველოს სანდრა გადელია წარადგენს. 10 წლის მომღერალმა წარმომადგენლის სტატუსი საზოგადოებრივი მაუწყებლის საბავშვო მუსიკალურ პროექტ რანინაში გამარჯვების შედეგად მოიპოვა.

სიმღერას, რომლითაც პატარა მომღერალი საქართველოს ევროპულ სიმღერის კონკურსზე წარადგენს, You are not Alone (შენ მარტო არ ხარ) ჰქვია და გიგა კუხიანიძის შექმნილია, ტექსტი კი თემო საჯაიას ეკუთვნის.

ფოტო: Junior Eurovision / EBU

რიგით მე-18 საბავშვო ევროფესტივალი 29 ნოემბერს გაიმართება და მას უკვე მეორედ, პოლონეთი უმასპინძლებს. პოლონეთმა მასპინძლობის უფლება გასულ წელს, ზედიზედ მეორე გამარჯვებით მოიპოვა, როცა 12 წლის მომღერალი, ვიკი გაბორი, სიმღერით Superhero და რეკორდული 272 ქულით კონკურსი ტრიუმფატორი გახდა.

საბავშვო ევროვიზია 2020-ზე 12 ქვეყანა მიიღებს მონაწილეობას. 2012 წლის შემდეგ კონკურსზე ამდენად მცირე რაოდენობის ქვეყანას მონაწილეობა არ მიუღია, რაც, დიდწილად კორონავირუსის პანდემიას უკავშირდება. შექმნილ ვითარებას უკავშირდება შეცვლილი ფორმატიც — ისტორიაში პირველად, მონაწილე შემსრულებლები სიმღერებს საკუთარი ქვეყნებიდან შეასრულებენ, თუმცა მთავარი შოუ ვარშავის სატელევიზიო სტუდიიდან გადმოიცემა. კონკურსის სლოგანი წლეულს Move the World (აამოძრავე მსოფლიო) არის.