შინაგან საქმეთა სამინისტრომ ერთი პირი 3 კილოგრამამდე ნარკოტიკული საშუალება მეფედრონის სახლში დამზადება-შეძენა-შენახვის ფაქტზე დააკავა.

როგორც უწყებაში ამბობენ, დაკავებული უცხო ქვეყნის მოქალაქეა, ნარკორეალიზატორთა ჯგუფს წარმოადგენს და ინტერნეტნარკორეალიზაციისა და ნარკოტიკული საშუალება მეფედრონის დამზადების სქემაშია ჩართული.

ასევე, შსს-ს ცნობით, დაკავებული დროებით საცხოვრებელ სახლში, სხვადასხვა ქიმიური საშუალებისა და პრეკურსორებისგან ლაბორატორიული ინვენტარის გამოყენებით ამზადებდა ნარკოტიკულ საშუალებას და შემდეგ მის რეალიზაციას ინტერნეტით ახდენდა.

შინაგან საქმეთა სამინისტროს ინფორმაციით, დაკავებულის საცხოვრებელი სახლის ჩხრეკისას, ასევე, სხვადასხვა ადგილას მდებარე სამალავებიდან სულ 2 კილოგრამი და 300 გრამი მეფედრონი ამოიღეს. მათივე ცნობით, სახლის ჩხრეკისას ამოღებულია ამ ნარკოტიკული ნივთიერების დამზადებისთვის საჭირო ქიმიური ნივთიერებები, პრეკურსორები და შესაბამისი ლაბორატორიული ინვენტარიც.

შსს-ს ცნობით, საქმეზე გამოძიება საქართველოს სისხლის სამართლის კოდექსის 260-ე მუხლის 1-ელი და მე-4 ნაწილით, ასევე, 266-ე მუხლის 1-ელი ნაწილით მიმდინარეობს. აღნიშნული მუხლები კი გულისხმობს, ნარკოტიკული საშუალების, მისი ანალოგის ან პრეკურსორის უკანონო დამზადება, წარმოება, შეძენა, შენახვა, გადაზიდვა ან გადაგზავნასა და უკანონო გასაღებას. ასევე, ნარკოტიკული საშუალების, მისი ანალოგის ან პრეკურსორის, ფსიქოტროპული ნივთიერების ან მისი ანალოგის უკანონო წარმოებისათვის ფარული ლაბორატორიის მოწყობა ან შენახვას.

როგორც შსს-ში აცხადებენ, ამოღებული ნარკოტიკული საშუალებების ღირებულება შავ ბაზარზე 1 200 000 ლარს შეადგენს.