გირჩი მოქალაქეებს ისევ სთავაზობს, ფეხბურთის ეროვნული ნაკრების მატჩს სტადიონთან ეკრანზე უყურონ. პარტიის განცხადებით, ხვალ 20:45-დან ელოდებიან მაყურებელს ცენტრალურ შესასვლელთან.

გირჩი მოქალაქეებს მთავრობის დაწესებულ შეზღუდვებს ახსენებს და აცხადებს, რომ ისინი პირადი პასუხისმგებლობის აღებით აპირებენ მატჩის დასრულებამდე სტადიონთან ყოფნას.

"გვჯერა, რომ მატჩის დასრულების შემდეგ, ნაკრების საგულშემატკივროდ მისულ ფანებს პოლიცია ნადირობას და დაჯარიმებას არ დაუწყებს. თუმცა, ამის გარანტია არ არსებობს, ამიტომ ვერ მოგიწოდებთ 22:00-ის მერე ჩვენთან ერთად, სტადიონთან დარჩენისკენ. თუ გადაწყვეტთ, რომ დარჩეთ, ეს თქვენი პირადი პასუხისმგებლობა იქნება", — წერია ფეისბუქზე გამოქვეყნებულ ღონისძიებაზე.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე. ამ დადგენილების დარღვევის შემთხვევაში გათვალისწინებულია ჯარიმა 2 000 ლარის ოდენობით.