ექიმი ვაჟა გაფრინდაშვილი მეორე ტურში ხმების დაცვის მიზნით მოსახლეობას არჩევნებზე დამკვირვებლობას სთავაზობს. მისივე თქმით, მეორე ტურის სახით მოსახლეობას კარგი შანსი ეძლევა, საკუთარი ხმა დააფიქსირონ.

როგორც მან TV პირველის ეთერში განაცხადა, მთავრობა აღარ შეეცდება შედეგების გაყალბებას, რადგან ოპოზიცია არ აპირებს, მონაწილეობას.

"მივიდეთ არჩევნებზე მივცეთ ხმა იმას, ვინც ჩვენ გვინდა და დავიცვათ ჩვენი ხმა. როგორ დავიცვათ? მე თანახმა ვარ, ნებისმიერი არასამთავრობო ორგანიზაციის, ნებისმიერი პარტიის დამკვირვებელი ვიყო", — განაცხადა ვაჟა გაფრინდაშვილმა.

31 ოქტომბრის საპარლამენტო არჩევნების შედეგებს ოპოზიცია არ აღიარებს. ბარიერგადალახულმა რვავე პარტიამ პარლამენტში შესვლაზე უარი განაცხადა. გარდა ამისა, ისინი მეორე ტურებში მონაწილეობაზეც უარს ამბობენ, რომელიც 17 ოლქში გაიმართება.

პატრიოტთა ალიანსის გარდა, პარტიები ერთობლივ საპროტესტო აქციებს აწყობენ. ისინი მოითხოვენ, რომ ცენტრალური საარჩევნო კომისიის ახალი ადმინისტრაციის პირობებში ხელახალი არჩევნები ჩატარდეს.

ოპოზიციის ბრალდებებს უარყოფენ ქართულ ოცნებაში. როგორც მმართველ პარტიაში აცხადებენ, ისინი მზად არიან დიალოგისთვის, თუ ოპოზიცია არჩევნების შედეგებს პატივს სცემს.

ქართული ოცნების გენერალურმა მდივანმა და თბილისის მერმა, კახა კალაძემ მოუწოდა პოლიტიკურ პარტიებს, რომ ქუჩის ნაცვლად პროცესმა მოლაპარაკებების პროცესში გადაინაცვლოს და ამაში საერთაშორისო პარტნიორებიც ჩაერთონ.