2016 წლის დეკემბერში საქართველოში შემოსული ფულადი გზავნილების ნაკადი, წინა თვის და 2015 წლის იმავე პერიოდთან შედარებით, გაზრდილია.

ეროვნული ბანკის მონაცემებით, 2016 წლის დეკემბერში საქართველოში 119 მილიონი ამერიკული დოლარი გადმოირიცხა, რაც ნოემბერში გადმორიცხულ თანხაზე (98 მლნ დოლარი) 21 მილიონით მეტია. გასულ წლის დეკემბერში გადმორიცხული თანხის მოცულობა მეტია 2015 წლის იმავე პერიოდში გადმორიცხულ თანხაზეც. 2015 წლის დეკემბერში საქართველოში 17 მილიონით ნაკლები, 102 მილიონი დოლარის მოცულობის თანხა გადმორიცხა.

2016 წლის დეკემბერში ყველაზე მეტი თანხა საქართველოში რუსეთიდან - 41,5 მლნ, აშშ-დან -14,1 მლნ, იტალიიდან - 12,3 მლნ და საბერძნეთიდან 11,9 მლნ შემოვიდა.

2010-2016 წლებში დეკემბერში გადმორიცხულ თანხებს შორის 2013 წლის დეკემბერი ლიდერობს. მაშინ საქართველოში თითქმის 155 მილიონი ამერიკული დოლარი გადმორიცხა.

2016 წლის ნოემბერში, ოქტომბერთან შედარებით, ქვეყანაში შემოსული ფულადი გზავნილების ნაკადების მოცულობა 4,7 მილიონი ამერიკული დოლარით შემცირდა და 97,8 მილიონი ამერიკული დოლარი გახდა. თუ 2016 წლის ნოემბერს გასული წლის იმავე პერიოდს შევადარებთ, ამ შემთხვევაში, ფულადი გზავნილების მოცულობა 12,6 მილიონი ამერიკული დოლარით გაზრდილია.