9 ნოემბრის აქციაზე დაკავებული სამი პირის ადვოკატი, ედუარდ მარიკაშვილი, აცხადებს, რომ პოლიციამ აქციის წევრები ჯერ მიფარებულ ადგილას გადაიყვანა, შემდეგ კი მათზე ფიზიკურად იძალადა. მისივე თქმით, ეს ჰგავს პოლიციის მხრიდან შურისძიებას.

"ფიზიკური ძალადობა მოხდა საპატრულო პოლიციის დეპარტამენტის ეზოში, საპატრულო პოლიციის მანქანაში, ამისთვის ის სპეციალურად ჩასვეს მინივენში, გადაიყვანეს მოფარებულ ადგილას და იქ მიაყენეს ფიზიკური შეურაცხყოფა მას გაუხსენეს ის აქტივობა რომელსაც ის ახორციელებდა წინა წელს, აქციების დროს, მათ შორის, პოლიციასთან კამათი, ეს ჰგავდა რა თქმა უნდა შურისძიებას, ვინაიდან როგორც ირკვევა პოლიციელს ჰქონდა გარკვეული ინტერესი არამხოლოდ დაკავებულების, აქტივისტების მიმართ, არამედ განსაკუთრებული ინტერესი ჰქონდა ბატონი გიორგი მჟავანაძისადმი", — განაცხადა ედუარდ მარიკაშვილმა.

გუშინ მოძრაობა სირცხვილიამ პარლამენტთან აქცია გამართა. ეს აქცია გადაადგილების შეზღუდვის ამოქმედებასთან ერთად, 22:00-ზე დაიწყო. აქტივისტების განცხადებით, ისინი შეზღუდვებს დაუმორჩილებლობას უცხადებდნენ.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.