საერთაშორისო გამჭვირვალობა-საქართველო მიიჩნევს, რომ პროკურატურა გოგი თოფაძის იმ განცხადებებით უნდა დაინტერესდეს, სადაც ის საგარეჯოში ჩატარებული არჩევნების შესაძლო გაყალბებაში თავდაცვის მინისტრ თინა ხიდაშელს ადანაშაულებს. ორგანიზაციის მიერ გავრცელებულ განცხადებაში წერია, რომ რადგან თოფაძის მხრიდან გარკვეულ მტკიცებულებებსა და დოკუმენტაციაზეც იყო საუბარი, მისი ბრალდებების იგნორირება დაუშვებელია.

TI-ის მიერ გავრცელებულ განცხადებაში აღნიშნულია, რომ არჩევნების გაყალბება სისხლის სამართლის დანაშაულია და შესაბამისად არაერთი მუხლით ისჯება. ორგანიზაცია ხაზს უსვამს იმასაც, რომ სისხლის სამართლის საპროცესო კოდექსის 101-ე მუხლის თანახმად, გამოძიების დაწყების საფუძველია დანაშაულის შესახებ ინფორმაცია, რომელიც გამომძიებელს ან პროკურორს მიაწოდეს, გამოვლინდა სისხლის სამართლის პროცესის დროს ან გამოქვეყნდა მასმედიაში.

“პოლიტიკური კონტექსტის მიუხედავად, ის განცხადებები, რომელიც დანაშაულის შესაძლო ფაქტებს შეიცავენ სამართალდამცველების მხრიდან რეაგირების გარეშე არ უნდა დარჩეს. საზოგადოებას უნდა ჰქონდეს გამოძიების მიერ დადგენილი უტყუარი ინფორმაცია იმასთან დაკავშირებით, რომ თოფაძის განცხადება არ შეესაბაამება სიმართლეს და საქმე გვაქვს ცილისწამებასთან “, - აღნიშნულია განცხადებაში.

2016 წლის 10 თებერვალს ფრაქცია ქართული ოცნება-მრეწველების თავჯდომარე გოგი თოფაძემ საქართველოს თავდაცვის მინისტრი თინა ხიდაშელი საგარეჯოში 2015 წლის ოქტომბერში ჩატარებული არჩვენების გაყალბებაში დაადანაშულა. ამ არჩევნებში ქართული ოცნების კანდიდატმა, რესპუბლიკელმა თამარ ხიდაშელმა, პატრიოტთა ალიანსის კანდიდატი ირმა ინაშვილი რამდენიმე ასეული ხმით დაამარცხა.