მმართველი გუნდიდან წამოსულმა დეპუტატმა, პარტია სამართლიანობის ლიდერმა, ეკა ბესელიამ პარლამენტთან მიმდინარე აქციაზე ყოფილ ლიდერზე, ბიძინა ივანიშვილზე ისაუბრა და განაცხადა, რომ მისთვის არ აქვს მნიშვნელობა, ვინ იქცევა უსამართლოდ, რადგან მიუღებელია თავისუფალი არჩევანის წართმევა.

"დიახ, მე მას კარგად ვიცნობ, ძალიან კარგად ვიცნობ და ერთადერთი, რაც მას უკან დაახევინებს, ეს თქვენი ძალაა, თქვენი სიმტკიცეა და თქვენი გაუტეხლობაა. [...]

თუ მას ოდნავ გონიერება შერჩენია და ამ პოლიტიკურ სიხარბეს ძლევს, უკან უნდა დაიხიოს, იმიტომ, რომ ხალხის წინააღედგ წასვლა არავის შერჩენია", — განაცხადა ბესელიამ.

ბესელიამ ისაუბრა იმაზეც, რომ აქციაზე შეკრებილი მოსახლეობა უკვე გამარჯვებულია, რადგან ეს გამარჯვება არ იზომება ცესკოს შედეგებით.

"გამარჯვება არ იზომება იმით, რას წერს ხელისუფლება საკუთარი სურვილის მიხედვით, გამარჯვება იზომება იმით, რამდენად შეგიძლია, დაძლიო შენი შიში, რამდენად შეგიძლია, დაძლიო ყველა წინაღობა, რამდენად შეგიძლია, წინ აღუდგე უსამართლობას. ამიტომ ხართ თქვენ გამარჯვებულები.

აქ, ამ ადგილას, სადაც ჩვენ ბევრი წელი გვიბრძოლია თავისუფლებისთვის და სამართლიანობისთვის, არ მახსოვს არცერთი შემთხვევა, როდესაც ხალხის წინააღმდეგ მდგარ ხელისუფლებას გაუმარჯვია, ეს არასოდეს არ მომხდარა", — განაცხადა მან.

ამ წუთებში პარლამენტის წინ წარსულში ერთმანეთთან დაპირისპირებული ოპოზიციური პარტიები საერთო აქციას მართავენ და არჩევნების შედეგებს აპროტესტებენ.

ოპოზიციური პარტიები არჩევნების შედეგებს არ აღიარებენ და არალეგიტიმურად ცნობენ. ყველა ბარიერგადალახულმა პარტიამ უარი თქვა მეორე ტურში მონაწილეობასა და პარტლამენტის მანდატებზე.

არჩევნების შემდეგ, როცა ოპოზიციამ აქციები დაანონსა, სამთავრობო გუნდი და საკოორდინაციო საბჭოს წევრები უფრო მკაცრად აცხადებენ, რომ აქციები ვირუსის გავრცელების საფრთხეს შეიცავს და მოუწოდებენ მოქალაქეებსა და პოლიტიკურ ლიდერებს დაიცვან წესები.