აზერბაიჯანის პრეზიდენტ ილჰამ ალიევის განცხადებით, ქალაქი შუშა აიღეს. "ჩვენ დავბრუნდით, შუშა ოკუპაციისგან თავისუფალია", — წერს ალიევი ტვიტერზე. ქვეყანაში ქალაქის დაბრუნებას უკვე ზეიმობენ.

სომხეთის თავდაცვის უწყებაში კი აცხადებენ, რომ შუშისთვის ბრძოლა გრძელდება.

ქალაქზე კონტროლი ორივე მხარისთვის განსაკუთრებით მნიშვნელოვანია. მას მთელი ყარაბაღის ასაღებად სტრატეგიული მნიშვნელობა გააჩნია, მაგრამ ქალაქს ისტორიული დატვირთვაც აქვს. სომხები და აზერბაიჯანელები შუშა/შუშის თავიანთ "აკვანს" უწოდებენ.

დღეს სომხეთსა და აზერბაიჯანს შორის ომის 43-ე დღეა. მთიან ყარაბაღში სამხედრო დაპირისპირება 27 სექტემბერს განახლდა. რამდენჯერმე დაიბომბა მშვიდობიანი დასახლებული პუნქტები. გაჩნდნენ ახალი იძულებით გადაადგილებული ადამიანები. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე ორჯერ შეთანხმდნენ, თუმცა ზავი, ორივეჯერ მალევე დაირღვა. ბაქომ და ერევანმა ცეცხლის შეწყვეტაში ისევ ერთმანეთი დაადანაშაულეს.

ამავე თემაზე: