ენმ-ს პარტიული სიის პირველმა ნომერმა, ბუბა კიკაბიძემ მოსახლეობას ხვალ, რუსთაველთან აქციაზე მისვლისკენ მოუწოდა. მისი თქმით, ყველა უნდა მივიდეს, ვისაც შეუძლია, თორემ მოვა დრო, როცა "ავტომატიანი რუსები" მივლენ.

"ჟირინოვსკის "მაყურებელია" პუტინი, ჩვენი "მაყურებელი", მე ახლა იმ ენაზე ვლაპარაკობ, ძველ ბიჭებს რომ ვეეძახით. ჩვენი მაყურებელი გამოდის ეს პარლამენტის დირექტორი, ივანიშვილი. სულში ჩაგვაფურთხა, ამის იქეთ არაფერი კეთდება მგონი, რაც გასაფუჭებელი იყოს ყველაფერი გააფუჭეს. ამიტომ ყველა უნდა მივიდეთ, ვისაც მოძრაობა შეგვიძლია, თორემ ის დროც მოვა, ავტომატიანი რუსები მოვლენ, ბიძინას მეგობრები, და მერე გვიან იქნება", — განაცხადა კიკაბიძემ მთავარი არხის ეთერში.

უკვე მეშვიდე დღეა ოპოზიცია არჩევნების შედეგებს აპროტესტებს და ცესკოს გაყალბებაში ადანაშაულებს. ისინი არჩევნებს არალეგიტიმურად ცნობენ, მეორე ტურში მონაწილეობაზე უარს ამბობენ და ვადამდელის დანიშვნას მოითხოვენ.

8 ნოემბერს რუსთაველის გამზირზე ოპოზიციურ პარტიებს საპროტესტო აქცია აქვთ დაგეგმილი. აქციას უერთდება ყველა ბარიერგადალახული ოპოზიციური პარტია პატრიოტთა ალიანსის გარდა.